වැඳ වැඳ යදිමි...

යාදිනි යදිමි ලක් ජනයා සිහි කරලා...

දිය නා පිරිසිදුව, සැරසී සුදු                      වතකින්
හදවත පුරෝගෙන උත්තම               ශ්‍රද්ධාවෙන්
තිසරණ සරණ ගොස් පන්සිල් ගෙන  බැතියෙන්
සුවඳ මල් පහන් පිදුවෙමි බුදුන්                   නමින්

සජ්ජායනය කර පිරිතුත්, ටිකක්   වෙලා
පිංපෙත් පුදා හැම දෙවියන් සිහි   කරලා
ඒ ඒ දෙවිඳු වෙනුවෙන් පූජා            පුදලා
යාදිනි යදිමි ලක් ජනයා සිහි         කරලා

දැන් නං බංකොලොත් රටකිය          ලංකාව
ගොඩ ගෙන දෙන්න එය උවිඳුනි, නොපමාව!

මතු බුදුවන්නා වූ ශ්‍රී බුද්ධ බල ඇති- ගුරුලාසනයෙහි වැඩ සිටින- නීල වර්ණයෙන් බබළන්නා වූ මහා බලවත් ආයුධ සතරක්‌ ඇති- දස අවතාර ඇති- ලංකාරක්‍ෂක සර්ව බලධාරී ශ්‍රී විෂ්ණු දිව්‍ය රාජෝත්තමයාණන් වහන්ස,

මේ ශ්‍රී ලංකාද්වීපයෙහි මහජනතාවට සිද්ධ වී ඇත්තා වූ අණ විණ, කොඩි විණ, හදි හූනියම්, වැල් පැන්නුම්, ඉරි පැන්නුම්, ඇස්‌වහ, කටවහ, හෝවහ, අඬෝවැඩියා ආදී සියලු දෝෂයන් දුරු කර දෙන සේක්‌වා.. යම් හෙයකින් නවග්‍රහ මණ්‌ඩලයේ රවි- චන්ද්‍ර- කුජ- බුධ- ගුරු- ශුක්‍ර- ශනි- රාහු- කේතු යන නවග්‍රහයින් විසින් ඇති කරන්නා වූ යම් අපලයක්‌ වේ නම් ඒවාද දුරු කර දෙන සේක්‌වා...

පුද දෙමි සමිඳ නිල් කටරොලු ඔබෙ  නමට
පුද දෙමි සමිඳ නිල් මහනෙල් ඔබෙ   නමට
දල්වන්නෙමි ගිතෙල් පහනුත් ඔබෙ නමට
මදුරුතලා කොළ මාලාවත්               ඔබට

දහසක් නමින් ඇමතෙන දෙවි-  ගෝවින්ද
අනන්ත, හරි, නාරායන දෙව්             සමිඳ
පද්මනාභ, පුරුෂොත්තම ඔබ         නමැද
අයදිමි- රකින ලෙද සිරිලක අප        සැමද

ශ්‍රී විෂ්ණු දිව්‍ය රාජෝත්තමයානන් වහන්ස- මේ සියලු පූජාවන් ඔබ වහන්සේ වෙනුවෙන් පූජාකොට, පිං අනුමෝදන් කර කියා සිටින්නේ ශ්‍රී ලංකාද්වීපය වෙත ඔබ වහන්සේගේ දිව්‍ය සවන් යොමා- ඔබ වහන්සේගේ දිව්‍ය නේත්‍ර යොමා, සකල ශ්‍රී ලංකාවාසී ජනතාව පෙළන්නා වූ සකල රෝග, සකල දෝෂ- සකලෝපද්‍රවයන් නිවාරණය කර, සකල කාර්යයන් සාර්ථක කර දී මාරක- බාධක ඒරාෂ්ටක, ග්‍රහදෝෂ, දුරු කරවා සර්ව ආරක්‍ෂාව ඇති කර සෞභාග්‍ය උදා කර දීමට පෙරාතුව...

ඔවුනට මනා වූ සිහිය; මනා වූ බුද්ධිය; මනා වූ තීන්දු තීරණ ගැනීමේ හැකියාව ලබා දෙන සේක්වා කියායි!

නැති නම් සිහිය හරි තීරණ      ගැනීමට
හැකි වෙද සුදුසු අය නයුවන්      කිරීමට
පත් කළ සියල්ලන් මෙතුවක් කාලෙකට
අඩියෙන් අඩිය රට යවලා       ප්‍රපාතෙට

දෙවිඳුනි විෂ්ණු සුරකින්නට                  ලංකාව
බාරලු ඔබට, ඇත්තද ඒ                     කතිකාව
දැන් නං බංකොලොත් රටකිය            ලංකාව
ගොඩ ගෙන දෙන්න එය උවිඳුනි,   නොපමාව!

ඒ පිරිපතින් රට ගොඩ ගන්නට   දිරිය;
සවිය ඇති අයට- දෙවිඳුනි දෙමු    බලය

සුසුදු සමන් මල් මලා ගොතා         ගෙන
සඳුන්, කපුරු, පළතුරු පහකුත් රැගෙන
තැඹිලිත් පිනි දියත් වට්ටියෙ  තියාගෙන
ආවෙමි- සමන් දෙවිඳුනි ඔබ   නමදින්න

සුරිඳුනි සමන්, ඔබ සිරිලක දෙවියෙක්ය
සිරිලක; ඔබගෙ මවුබිම අද     අවුලකය
ඒ පිරිපතින් රට ගොඩ ගන්නට    දිරිය;
සවිය ඇති අයට- දෙවිඳුනි දෙමු     බලය

පළමුවර සිරිලකට සපැමිණි 
          දිනේ උත්තම මුනි             රදුන්
යකුන් දමනය කරනු දැක, හද-
          වත පුරෝගෙන   සැදැහැයෙන්
පුදන්නට නිසි යමක් යැද- ලද
          කේශ ධාතුන් කර          නිධන්
මහී අංගණ සෑය තැනවූ
          සමිඳ, දෙනු මැන මට      සවන්

සාධූ, සාධූ, තෙදවරම් පස්‌වාන් දහසකට මේ ශ්‍රී ලංකාද්වීපයේ සකල ලෝක සත්ත්වයාගේ කරුණා නිධාන වූ සෝවාන් ඵලයෙහි පිහිටා වැඩ වසන ශ්‍රීමත් උතුම් සුමන සමන් දෙවි මහාරාජෝත්තමයාණන් වහන්ස- සුදු ඇත් වාහනාරූඪව සමන්තකූට පර්වතයට, සබරගමුවට, ශ්‍රී පාද පද්මයට, එල්ලක්‌කලට, දිවා ගුහාවට, බෑන සමනලයට දිවැස්‌ කරුණාකර බලා වැඩ වදාරන්නා වූ ඔබ දිව්‍ය රාජෝත්තමයාණන් වහන්සේට දොහොත් මුදුන් තබා සැල කර සිටින්නේ...

-අන්ත අසරණ වී සිටින්නා වූ සකල ශ්‍රී ලංකාවාසීන්ට- ඔවුන් පත්වී සිටින්නා වූ තීරණාත්මක කාල වකවනුව ගැන නිසි අවබෝධයක්ද; මේ තත්ත්වය ඇති කරවීමෙහි ලා පුරෝගාමී වූවන් ගැන මනා වූ දැනීමක්ද ලබා දී-
රටවැසි තම තමන් විසින් සතර අගතියෙන් එකකට හෝ කිහිපයකට හෝ වැටීම නිසා- නොඑසේ නම් පටු වාසි තකා අතීතයේදී ගනු ලැබුවා වූ තීරණවල අමනොඥභාවය අවබෝධ කර ගන්නට හැකියාව ලබා දී...

බුද්ධිමත්ව- නැණ නුවණ මෙහෙයවා සුදුසුම සත් පුරුෂයන් වෙත රට මෙහෙයවීමේ භාරධූර වගකීම ඉෂ්ට සිද්ධ කරන්නට ශක්තිය- ධෛර්යය හා නැණ-නුවණ ලබා දෙන සේක්වා කියායි...

දෙවියන් හාල් කැවිලා වාගෙයි               දැනටත්
උන්ම බෙදී කුණු රෙදි එළියේ                 සෝදත්
තව තව කුළල් කා ගන්නට දී                 සවියත්
සමිඳුනි කරනු මැන උන් සේරම හෙම්බත්

සිරස නවලා බැතින් වැන්දෙමි -
         දෝත හිස මත නඟා       වැන්දෙමි
සාධු සාධූ කියා වැන්දෙමි -
         කදිර සුරිඳුනි ඔබට          වැන්දෙමි
උමා- මෙහෙසුරු පුතුට වැන්දෙමි -
         ගජාණන සොහොයුරුට වැන්දෙමි
කන්දසාමිනි ඔබට වැන්දෙමි -
         අපේ පිරිපත ඔබට              පවසමි

බුලත් විසි එක තියා පුද දෙමි -
         පංච පලතුරු - කැවිලි පුද   දෙමි
දීප දල්වා ඔබට පුද දෙමි -
         සුවඳ දුම් දී ඔබට පුද           දෙමි
රතු පැහැති මල් ඔබට පුද දෙමි -
         පුදා අපගේ දුක       කියන්නෙමි
මුදවලා ඒ දුකෙන් අප සැම -
         රකිනු මැනවැයි ඔබෙන් අයැදිමි

සාධු! සාධු!! සාධූ!!! දොහොත් මුදුනේ තබා වැන්දෙම්, දෙපා වැන්දෙම්, ශ්‍රීමත් සිද්ධ තේජෝබල පරාක්‍රමාන්විත රණමයුර වාහනාරූඪව රක්‌තවර්ණ ශ්‍රී දේහයකින්ද- මුහුණු සයකින්ද යුතුව- විචිත්‍ර නානා විධ ආයුධ දොළසක්‌ අත් දොළොසේ දරා නිතර කන්දේ වැඩ වාසය කරන තෙද ඇති කතරගම දිව්‍යරාජෝත්තමයාණන් වහන්ස; කතරගමට, කිරි වෙහෙරට, මැණික්‌ ගංගාවට, රුහුණු මාගම්පුරට, වැඩහිටි කන්දට, මුන්නේශ්වරම් දේවාලයට, යහතින් දිවැස්‌ලා බලා වැඩ වාසය කරන සිද්ධ ස්‌කන්ධ නාමෝපලක්‌ක්‍ෂිත කතරගම දෙවි මහා රාජෝත්තමයාණන් වහන්ස, ඔබ දෙවි හාමුදුරුවන් වහන්සේට දෝත නඟා අයැද සිටින්නේ මේ අසරණ ශ්‍රී ලංකාවාසීන්හට සිතින්, කයින්, භාරවීමකින්, අමතක වීමකින් හෝ අප අත යම් වරදක්‌ ඇතත්, ඔබ වහන්සේ සමා වී අප විසින් නමස්‌කාරයෙන් කියා සිටින අභිමතාර්ථයන් ඉෂ්ට කරදීමෙන්ද- ඇස්‌වහ, කටවහ, නවග්‍රහ හූනියමකින් වැද පැමිණි සියලු දෝෂ නසා දුරු කොට පිනට පිහිට වී පින් ගන්නා සේක්‌වා... ඔබ කීර්ති පස්‌වාන් දහසකට ආයු බොහෝ වේවාාා! ආයු බොහෝ වේවාාාා!! ආයු බොහෝ වේවාාාා!!!

මතු බුදු බව පතමින්, පිනට පිහිට වෙමින් පාරමී පූරණය කරමින්, සියලු සත වෙතට පතළ මහා කරුණා දයාවෙන් යුතුව පිහිට වෙන කාචරග්‍රාමවාසී ස්කන්ධ කුමාර දේව රාජෝත්තමයාණන් වහන්ස- ගෞරව බහුමානයෙන් යුතුව; සකල ශ්‍රී ලංකාවාසී නර පණුවන් වෙනුවෙන් ඔබ වහන්සේට තව දුරටත් සැල කර සිටින්නේ...

හොරෙන් ගසා කෑවුන් මදි      නොකියන්ට,
ජාතික ධනය යටි මඩි ගැසු           පවිටුන්ට
ලෙහෙසිය සමිඳ- ඔබ බැහැදැක්මට   එන්ට;
නිර්ලෝභීව පුද පඬුරුත් පුද              දෙන්ට

උන් පුද දෙන්නෙ - අපගෙන් අරගත්      දේවල්
උන්ට වඩා යහපත් නෙව සත්තුත්              වල්
දිව නෙත් යොමා විමසාලා මේ               දේවල්
පුද පිළිනොගෙන - තව කළ මැන උන්ව  අවුල්  

දෙවියන් හාල් කැවිලා වාගෙයි              දැනටත්
උන්ම බෙදී කුණු රෙදි එළියේ                සෝදත්
තව තව කුළල් කා ගන්නට දී                සවියත්
සමිඳුනි කරනු මැන උන් සේරම හෙම්බත්

එවැනි දේවල් ඇස් පනාපිට සිද්ද වෙද්දිත් -
               නොවැටහෙයි තතු      සමහරුන්හට
නෙතේ කොරපොතු; හිතේ කැරපොතු -
               ගති ඉතිරි වී වගෙයි             ඇත්තට
එවන් අයගෙත් දෙනෙත් පාදා-
              සිහි නුවණ දීලා                   ඔවුන්හට
පොළොඹවනු මැන ඔවුන් සැවොමත් -
              නිසි කෙනාටම ඡන්දෙ   දෙන්නට

එසේමය, දේව රාජයාණන් වහන්ස- සකල ශ්‍රී ලංකාවාසීන්ගෙන් එක් කෝටි හැත්තෑ ලක්ෂ හැටතුන් දහස් තුන්සිය හතලිස්  තුන් දෙනෙක් (1,70,63,343 ) දෙනා එළැඹෙන 2024 සැප්තැම්බර් මාසයේ 21 වෙනිදා ඊළඟ විධායක ජනාධිපතිවරයා තෝරා පත්කර ගැනීමට ස්වකීය ඡන්දය පාවිච්චි කරන්නට සූදානම් වන මෙකල්හි....
එකී ඡන්දදායකයන්ව ඡන්ද- දෝෂ- භය- මෝහ කියන්නාවූ සතර අගතියෙන් එකකට හෝ පත් කරවා; රවටා ගැනීමේ පවිටු චේතනාවෙන් යුතුව...  එකී අසත්පුරුෂයන් විසින් අනිසි ලෙස උපයාගන තිබෙන මහා ධනස්කන්ධයන්ගෙන් කොටසක් නිර්ලෝභීව වියදම් කෙරෙමින් දියත් කෙරෙන්නාවූ මඩ ප්‍රහාර- බොරු ප්‍රචාර- අසත්‍ය කතන්දර- වාගාඩම්බර දෙඩීම් අනන්ත අප්‍රමාණ ප්‍රමාණවලින් වැඩි වර්ධනය වෙමින් පවතින මෙකල්හි...

පොළොඹවනු මැන ඔවුන් සැවොමත් - නිසි කෙනාටම ඡන්දෙ දෙන්නට

-ඒවාට නොරැවටෙන්නටත්- මුලාවේ නොවැටී සිටින්නටත්, එසේ මුලා නොවී සිටිමින්...

-සැබෑ, සත්‍යවාදී, ජනතාවට හිතැති, ශ්‍රී ලංකාවේ අභ්‍යුදයම පතන අවංක- ජනතාවාදී- නායකයෙකු ශ්‍රී ලංකාවේ මීළඟ ජනාධිපති ලෙස තෝරා පත්කර ගන්නට සිරිලක ඡන්දදායකයන්ට අවශ්‍ය බුද්ධි මහිමය, ශක්තිය, කැමත්ත හා ධෛර්යය ලබා දෙනු මැනවියි ආයාචනා කර සිටිමින් මෙසේද යදින්නෙමි:

රට ගැන කියා බලයට විත් - කොහොම     හරී
රට කන මජර කෑදරකම් තිබෙන                පිරී
ප්‍රතිපත්තියක්- ලජ්ජාවක් නොමැති         ‘නරී
ඔක්කොම’ මෙවර පරදන්නට දෙන්න දිරී෴0෴