Nice View

‘අපිට ඕන තරම් මේ ජීවිතයෙදි හම්බෙනවානෙ තමන්ගේම කියලා දෙයක් නොකර අනුන්ගෙන්ම දේවල් වලින් යැපි යැපී, අනුන්ටම ගරහන අය. (කාටද කියන්නේ කියලා තේරෙනවානෙ). එහෙම අනුන්ගෙ දේවල් අරගෙන ලංකාවේ අංක එක වුණත් කවදාවත් යාදෙන්නෙ නෑ. ඊට වඩා තම මහන්සියෙන් ලැබෙන පොඩි දෙයක් උනත් අපිට යාදෙනවා, සතුටක්  තියෙනවා. ඒ වගේම නිකම් ලැබෙන කිසිම දේක අගයකුත් නෑ. ඉතිං තව කෙනෙක්ගෙ දෙයක් හොරෙන් අරගෙන පුහු ජයග්‍රහණ පෙන්වන මුග්ධ පුද්ගලයින් හට ලැජ්ජාව, භිය කියන දේ ඇති වී, මේ සිනමාපටයේ කතාව වගේ තම මහන්සියෙන් දෙයක් කිරීමට හේතු වාසනා වේවා කියලා පතනවා.’

තම මහන්සියෙන් ලැබෙන පොඩි දෙයක් වුණත් අපිට යාදෙනවා...

රවිඳු හේෂාන් එහෙම ලියලා තිබ්බේ හරියටම මාසෙකට කලින්. Nice View චිත්‍රපටය ගැන හැඳින්වීම් ලිපියේ. රවිඳු වගේ අය එහෙම හිතුවට එහෙම නොහිතන අයත් මේ සිරි ලංකාද්වීපයේ ඕනි තරං ඉන්නවා.

මේ සැරේ පළාත් පාලන ඡන්දයට ඉදිරිපත් වෙලා ඉන්න අපේක්ෂකයන් රොත්ත දිහා බලන්නකෝ. 80,000කට කිට්ටුලු!
බුදු අම්මෝ, මහජනතා අපි වෙනුවෙන් සේවය කරන්න කොච්චර ඉන්නවද?
පිරිසිදු චේතනා පාදයි වාසනා!! කියලයි සින්දුවකත් තියෙන්නේ. වාසනාව පාදා ගන්න හදන්නේ කාට වාසි වෙන්නද...
කාගේවත් හිතක තියෙන දේවල් කාටවත් පෙනෙන එකක්යැ?

ඔය ඉදිරිපත් වුණු උදවියගේ පොඩි පරහක් තියෙනවා වගේ හින්දයි මං එහෙම කිව්වේ. මේ අපේක්ෂකයන්ගෙන් 20,000කටත් වැඩිය පිරිසක් විවිධ චෝදනා තියෙන අයලු.

‘ගෙවුණු කාලය තුළදී ඥාතීන්ට ටෙන්ඩර් ලබා දීම, කඩ කාමර බදු දීම සහ ආයතන සතු දේපළ අවභාවිත කිරීම යන චෝදනා ඉන් ප්‍රධාන වෙන බවයි වාර්තා වන්නේ.’ කියලයි ඒ වාර්තාවේ තිබුණේ.
එතනදී නොකියා කියා තියෙන දෙයකුත් තියෙනවා. එහෙම වැරදි කරන්නෙත් ඉතිං බලයක් තියෙන- බලයක් තිබුණු උදවියනේ. බලමුකෝ එහෙම දූෂිතයන් කොච්චර දෙනෙකුට මේ වතාවේ ආයෙමත් දිනන්න හැකි වෙයිද කියලා... රටේ ජනතාව හිතන විදිහ සහ ඔවුන්ගේ දේශපාලන සබුද්ධික බව මේ ඡන්ද ප්‍රතිඵලය පෙන්නාවි කියලයි මට හිතෙන්නේ.

බලය! ධනය!! තත්ත්වය!!! තව තවත් වැඩි කර ගන්න නේද අපෙන් වැඩි දෙනෙකු පොර කන්නේ... සේරම බලුකම් කරන්නේ... අනුන්ට උගුල් අදින්නේ?

මේ අයියා නංගී විදිහට කෙරෙන ඒ දෙන්නගෙ රඟපෑම බලන්න විතරක්ම වුණත් ‘නයිස් විව්’ බලන්න වටිනවා. ඒ තරං සුපිරියි එයාලගේ රංගනය.

ජිංග් හාඕ එහෙම දහදුරාකම් කරන කෙනෙක් නෙවෙයි.

කොහොමත් තරුණ වයසෙදී වැඩි දෙනෙක් දූෂිත නෑනෙ. Jing Haoත් එහෙමයි. කොල්ලට තවම අවුරුදු 20යි.
(විස්ස පරවෙලත් බල තණ්හාව නිසා තරුණ පෙළට ඉඩ දීලා පැත්තකට නොවෙන මිනිස්සු යහමින් ඉන්න කාලයක් නෙව මේ!)

ජංගම දුරකථන අලුත්වැඩියා කරමින් ජීවිතය ජය ගන්න හදන ජිංග් හාඕට තියෙන්නේ එකම හීනයයි. ඒ එයාගේ එකම නංගිව මරණයෙන් ගලවා ගන්න එක. ඒ රෝගී හුරතල් දැරියට තවම වයස අවුරුදු හයයි. මේ සිඟිත්තිය; ටොංග් ටොංග්ට අවුරුදු අට වෙන්න කලින් සැත්කමක් නොකළොත්... ඒ දෙන්නට ඉන්නේ ඒ දෙන්න විතරයි. දෙන්නා දෙන්නට පණ ඇරලා ආදරෙන් ඉන්නේ.
මේ අයියා නංගී විදිහට කෙරෙන ඒ දෙන්නගෙ රඟපෑම බලන්න විතරක්ම වුණත් ‘නයිස් විව්’ බලන්න වටිනවා. ඒ තරං සුපිරියි එයාලගේ රංගනය. මොනවද ඔට්ටු- මේ ෆිල්ම් එක නරඹද්දී, ඕනෑම දරදඬු කෙනෙකු එකම එක කඳුළක් හරි හෙළනවාමයි!

ඉතිං, අර හය හැවිරිදි දැරියගේ එච්චර බරපතල සැත්කමක් නිකම් කෙරෙනවයැ? සල්ලි කන්දරාවක් ගෙවන්න වෙනව කියල දොස්තර මහත්තුරු ජිංග් හාඕට කල් තියාම කියලයි තියෙන්නේ. ඒක නිසාමයි මිනිහා දන්න සෙල්ලම් ඔක්කොම දමමින් එක පාරම ලොකු සල්ලියක් හොයන්න plan ගහන්නේ.

මොන දේ කරන්නත් කොල්ලා හොඳටම දන්නේ ජංගමයන් ගැනනෙ. ඒවා තොගයක් එක්ක ජාවාරමක්...
මම මොකටද කතාවේ රසය අඩු කරන්නේ? මේ චුට්ට විතරයි ඔන්න හිතාදර පාඨක ඔයාලට දැන් කියන්නේ.

ඉතිං එයා අපතයන් අතරේ ඉන්න හොඳම දක්ෂයන්වත්, එයාගේ වැඩේට අරගන්නවා.

Jing Hao අයියණ්ඩි එයාගේ ආදරණීය චූටි නංගී Jing Tong රැකගැනීමේ එකම අභිලාෂයෙන් මාර game එකකට එන්ටර් වෙනවා. එකම එක ඥාතියෙකුගේ උදව් ඇතිවයි කොල්ලා ගේමට බහින්නේ. තනියම නං කීයටවත් කරන්න බැරි වැඩක්! ලොකු පිරිසක් ඕනි. එහෙම වැඩකට ගැලපෙනම කට්ටිය තෝරා ගැනිල්ලත් ලේසි වැඩක්යැ? එහෙම නොවුණොත් හෙණ අවුල්ය කියලා ජිංග් හාඕ හොඳටෝම දන්නවා.

ඒත්... එයාට ඕනි දක්ෂයන්. ඉතිං එයා අපතයන් අතරේ ඉන්න හොඳම දක්ෂයන්වත්, එයාගේ වැඩේට අරගන්නවා.

ආත්මාර්ථකාමී නොවී, නිවැරදි නායකත්වයක් දෙමින්; අවශ්‍ය තැනදී පරහිතකාමී වෙමින්- තමන්ගෙ mission එක අනතුරේ දාගන්න තරමටත් ඒ තරුණ හාදයා උතුම් ගති ඇත්තෙක්.

ඒකටත් එක්ක අපේ නායකයෝ!

රටේ අහිංසක දූලා- පුතාලා, මිනිස්සු වැඩි හරියක් හරි-හමන් කෑමක් බීමක් නැතිව දුක් විඳින අතරේ...
ලෝකෙට පරකාසේ වෙමින් නිදහස සමරනවා. නිකං නෙවෙයි. තම තමන්ගේ සාක්කුවෙන්; ගෙදරින් වියදම් කරලත් නෙවෙයි. අපේ සල්ලිවලින්... අපි ගෙවන බදු මුදල්වලින්.      

‘වැසිකිළි ලක්ෂ 142 ශබ්ද විකාශන ලක්ෂ 32 විද්‍යුත් තිර ලක්ෂ 27. නිදහස් උත්සවයේ වියදම් ලැයිස්තුව’ ඔන්න අද එළියට ඇවිදින් තියෙන පුවතක සිරස්තලය. එයින් කියන විදිහට...

‘රට ආර්ථික වශයෙන් මෙන්ම සියලු අංශයන්ගෙන් බංකොලොත් භාවයට පත්ව ඇති මොහොතක පෙරේදා (04) දින පවත්වනු ලැබූ නිදහස් දින උත්සවයේ වැසිකිලි පහසුකම් වෙනුවෙන් පමණක් රුලියල් ලක්ෂ 142ක (රු. 14,258,850) මුදල් වියදම් කරන බව අල්ලස, දූෂණය, නාස්තියට එරෙහි පුරවැසි බලය සංවිධානය පවසයි.

කොහොමෙන් හරි හැත්ත පස් වෙන නිදහස් සමරුව රුපියල් කෝටි 40ක් ගිල දාලා!  

එහි සභාපති ජාමුණි කමන්ත තුෂාර මේ බව අනාවරණය කරන්නේ මෙවර ජාතික නිදහස් දින උත්සවය වෙනුවෙන් රජය දරන වියදම් ඇතුළත් වාර්තාවක් ලබාදෙන ලෙස තොරතුරු දැන ගැනීමේ අයිතිවාසිකම් පනත යටතේ රාජ්‍ය පරිපාලන හා ස්වදේශ කටයුතු අමාත්‍යාංශයෙන් ලබාගත් තොරතුරු මතය. ඔහුට ලබාදී තිබූ වියදම් විස්තරය පහතින්...’ සේරෝම විස්තර බලා ගන්න වටිනවා ‘ගොසිප් ලංකා නිව්ස්’ අඩවියටම ගිහිං.

කොහොමෙන් හරි හැත්ත පස් වෙන නිදහස් සමරුව රුපියල් කෝටි 40ක් ගිල දාලා!

අපේ ලොක්කන් වගේම සල්ලි- සල්ලි කියල බලන්නේ නැතිව; චිත්‍රපටයේ නිෂ්පාදක Ning Hao ලෝස්බෝස් නැතිව වියදම් කරලයි Aka Qi Ji- Ben Xiao Hai ෆිලුම නිපදවල තියෙන්නේ. ඒ චීන නමෙන් හඳුන්වන්නෙත් ඉංගිරිසියෙන් Nice View නමෙන් හඳුන්වන ෆිල්ම් එකමයි. ‘නයිස් විව්’ 2022 වසරේ ‘Box Office’ ලෝක වාර්තා තියපු චීන ෆිලුමක්.
මිලියන 38ක් වියදම් කරලා නිෂ්පාදනය කෙරුණු Nice View ආදායම මිලියන 211ක් බවයි වාර්තා කියන්නේ. Wen Muye තමයි මේ චීන ෆිලුම අධ්‍යක්ෂණය කරලා තියෙන්නේ.

මොට්ට මං වහන්සේ චීන දන්නා එකක්යැ? ඒ ෆිලුමටත් සිංහල උපසිරැසි දීලා තිබ්බේ ‘බයිස්කෝප් සිංහලෙන්’ අඩවියේ. රවිඳු හේෂාන් විසින්.
ඔයාලට ගොඩක් පිං! අපි වගේ දුහුනන්ගේ ප්‍රයෝජනය තකා මෙහෙම හොඳ films සිංහල උපසිරැසි එක්ක අපට හඳුන්වා දෙන එක ගැන. මේ post එකේ ආරම්භයේදීම යෙදුව ඡේදයේ තියෙන (කාටද කියන්නේ කියලා තේරෙනවානෙ) යන වැකිය ගැනත් මෙතනදී කියන්න හිතෙනවා.

මොකද දන්නවද?

බයිස්කෝප් සිංහලෙන් අඩවියෙන් දෙන ‘සිංහල subs’ හොරකම් කරලා, තවත් අඩවිවලින් තමන්ගේ වගේ ඉදිරිපත් කරනවාලු. අනුන්ගේ දේවල් හොරකම් කරන; ඒවාට තමන්ගේ උප්පැන්න ලියාගන්න හදන; අනුන්ට හිමි ගෞරවය තමන් සතු කර ගන්න හදන අය කොහෙත් ඉන්නවනේ.
දැන් බයිස්කෝප් සිංහලෙන් අඩවියේ ඇඩ්මින්ලා නං ඒවා වළක්වන්න උපක්‍රම යොදලා.
ඒ නිසා මං වගේ උදවියටත් අමුතුවෙන්ම කරදර වෙන්න වෙලා. රවිඳු ලියපු ලියවිල්ල copy කර ගන්න බෑ. ඉස්සර වගේ නෙවෙයි, දැන් දෙන subsවල අකුරු ලොකු-පුංචි කර ගන්නත් බෑ. Subs ඩවුන්ලෝඩ් කර ගන්න ගියාමත් බය හිතෙන නිවේදනයක් එනවා. ‘Zip may be dangerous, so Chrome has blocked it.’ බයිස්කෝප් සයිට් එකෙන්ම අහලා තමයි මං නං දැන් බය නැතිව සබ්ස් බාගන්නේ.

හැමෝම කතාවෙන බුද්ධිගලනය නම් නිතර දකිනවානේ.

බය නැතිව?

බය නැතිව subs බාගන්නවා වුණත් ‘හදවත්ගලනය’ ගැන නං තව-තවත් බය නොවී බෑ වගෙයි. පහුගිය ජනවාරි 24 වෙනිදා ‘ලොකු අම්මත් එක්ක- සිව්වෙනි කොටස’ ලියද්දී ඔය ‘හදවත්ගලනය’ වචනේ මේ ලියන්නා නං දැනගෙන හිටියේ නෑ. මං හිතන්නේ සිංහල භාෂාව පාවිච්චි කරන කවුරුන්වත් ඒක පාවිච්චි කරලා තිබ්බෙත් නෑ.

ඉස්-ඉස්සෙල්ලම ඒ වචනේ නිපදවාගෙන; යොදා ගැනීමේ ගෞරවය අයිති කමීට. කල්‍යාණ මිත්‍ර blog අඩවිය ලියන කමීට. කමී ඒ වචනය පාවිච්චි කරන්නේ අවුරුදු එකහමාරකට පස්සේ එයාගේ ‘ඉස්ටැයිල් එකෙන්’ ලියන අලුත්ම post එකේදියි.

‘කරන්ට් නැතුව මොන රව්ටර්ද මහත්තයා? බ්ලොග් පුනර්ජීවන සම්මන්ත්‍රණ මාලාව අංක දෙක සහ හදවත්ගලනය- Welcome me back to blogging..!’ තමයි ඒ පොස්ටුව. ඒකෙ මුල කොටසේදීම කමී මෙහෙම කියනවා.

‘... අවුරුදු එක හමාරකින් මේ ආසාවෙන් බ්ලොග් සටහනක් ලියන්න අරන් තියෙන්නේ... ඒකට හේතු ගොඩයි.

පළවෙනිම හේතුව තමයි මාතෘකාවේ අන්තිමට තියෙන 'හදවත්ගලනය'... මම දන්නේ නෑ මේ වචනේ කලින් කොහෙවත් ලියවෙලා තියෙනවද කියලා. හැමෝම කතාවෙන බුද්ධිගලනය නම් නිතර දකිනවානේ. පුද්ගලිකව ඔය බුද්ධිගලනය කියන එකට මගේ මරාසාද් විරෝධයක් නැති නිසා මම ඒක ගැන ඒ හැටි වද වෙලා නෑ. බුද්ධිය හා හැකියාව කියන්නේ මිළ කලයුතු සම්පතක්. ඒකට නිසි වටිනාකමක් ලැබෙනකම් ඒක මාකට් කරන්න ඕනි. 'නිසි වටිනාකම' කියනෙකට පරිවාර එක්ස්ප්ලනේශන් ගොඩයි. නිසි වටිනාකම පුද්ගලයාට, අවස්ථාවට කාලයට අනුව වෙනස් වෙනවා. බුද්ධිය තියෙන එකා ඒක තමන්ට ගැලපෙන විදියට යොදාගන්න එහෙට මෙහෙට ගලනව... ඒක වැළැක්විය හැකි හෝ වැළැක්විය යුතු දෙයක් නෙවෙයි. වළක්වන්න ඕනිනම් කරන්න ඕනි තමන්ට ඕනි බුද්ධියට නිසි වටිනාකම දෙන එක. ආ... ඒ ඇති. හැබැයි 'හදවත්ගලනය' ඊට වඩා හැඟීම්බරයි...’
එහාටත් ගොඩ වැදෙන්න. හදවත්ගලනය ගැනත් දැනගන්න අතරේ ඔයාලට ඉතා රසවත්- හරවත් ලිපියක් කියෙව්වැකි!

ඉතිං හදවත්ගලනය වචනේ ඔන්න මාත් ඉල්ලා ගන්නවා, කමීට ස්තුතිවන්ත වෙමින්.

පෙබරවාරි 2 වෙනිදා හවස අපේ අකලංක පුත්තරයා මෙහාට ගොඩ වැදුණා, සිය පවුලත් එක්කම.

“බෑ මහප්පේ. දැන් එන විදිහට ලංකාවේ ඉඳලා බෑ. මාත් තීරණේ කළා මෙයාලත් එක්කම රටෙන් යන්න.”
“හෑ?” පුදුමයෙන් ‘හෑ’යි ගාලා මගේ කට ඇරුණු පාර තව ඩිංගෙන් කටට මැස්සොත් රිංගනවා.

ටැන්සානියාවේ කෙරුණු විදිහ මෙහෙත් කළා නං කොහොමට හිටියිද...

ගෝල්ෆේස් අරගල බිමේදී, මං වහන්සේ පැය 68 උපවාසයක් කළා මතකයිනෙ. එතකොට නෙවිල්, ජයශංඛ දෙන්නා එක්ක අකලංකත් මට තනි රැක්කා. එහෙදී ‘No පාර්කින්’ බෝඩ් එකක් මගෙ කකුල උඩට වැටිලා ඇඟිලි දෙකක් තැලිලා හිටින අතරෙත්-  මහරගම තිබුණු විරෝධතා කීපෙකටම මාව එක්ක ගියෙත් මේ අකලංකමයි.

ඒ විතරයැ? Blog අඩවියක් ලියන්න යනවා- මට එකක් හදලා දෙන්න කිව්වම, තාක්ෂණික උපදෙස් දීලා... සේරම වැඩ මට කියලා දුන්නෙත් මිනිහා.

මිනිහගෙ එකම වැරැද්ද, ‘මට ඒ තාක්ෂණික වැඩ එච්චර නොදිරවන විත්තියත්; මං වහන්සේ හෙමින් ඉගෙන ගන්න මැන්ටලයක් විත්තියත්’ තේරුම් නොගැනීම. එයා හැදුවේ දවසෙන් දෙකෙන් මාව කොම්පියුටර පකීර් කෙනෙකු කරවන්න. එව්වා කොහෙද මොට්ට මාත් එක්ක?

ඉතිං, අකලංකත් පිටරට රස්සාවකට යනවා කිව්වමයි මට පුදුම හිතුණේ.

මිනිහගෙ කුළුඳුල් පුතණ්ඩියාට නම තියන්න ගියාම ඒකාට ඕනි වුණේ ආර්ය කියලා නම තියන්න. ඒ මදිවට ඒකාට ඕනි වුණා ආර්ය කියන නම ‘ය අකුරට උඩින් රේපය; පහළට හැරවූ කොම්බුව’ දාලා උප්පැන්නෙටත් ලියවන්න. එච්චර දේශභක්තිය තිබ්බ මිනිහා.....? දැන්...

“බැහැනෙ මහප්පේ. දැන් tax එක කීයක්ද? Tax ගැහුවත් කමක් නෑ. ඒවා හරි විදිහට වියදම් කෙරෙනවා නං. අපෙන් හූරලා හූරලා අරගෙන උන්ට ඕනි විදිහට නාස්ති කරනව. නිකමට කියන්නකො මහප්පේ, ටැන්සානියාවේ කෙරුණු විදිහ මෙහෙත් කළා නං කොහොමට හිටියිද... බොරු පම්පෝරි ගහන්න වෙලාවක්ද මේ. මේ යන විදිහට ගියොත් නං...”

තරුණ පරම්පරාවට අද නොනවතින අරගලයක් කරන්න වෙලානෙ තියෙන්නේ- එහෙව් රටක් ඇති කර ගන්න.

දැන් මිනිහ ගිහිල්ලත් ඉවරයි.

කමීගේ පෝස්ටුවෙනුත් කියන විදිහට බොහොම අපූරු blog රචකයෙකුත් තව දින කීපෙකින්  අර විදිහටම නොරටක පැලපදියම් වෙන්න යන්නයි ලෑස්තිය! එයාලා ඒ වගේ තීරණ ගැනීම වැරදිය කියලා මට නං හිතන්නෙම නෑ.
හැබැයි, රටක පාලකයන් සතු ලොකුම වගකීමක් තමයි ඇයි දිගින් දිගටම මෙහෙම වෙන්නේ කියලා හොයා බලන එක.

නැතිනං...

‘අපි ජීවිතයේ කොච්චර නම් දේවල් අමාරුයි කම්මැලියි, මේක හිංදා මට ගොඩ යන්න පුළුවන් වෙයිද කියලා හිතලා අපේ ඉලක්ක කීයක් නම් අතාරින්න ඇත් ද? එහෙමත් නැත්නම් ඒ කාලය වටපිටාව අනුව අතාරින්න ඇත් ද? එහෙත් අපිට අවශ්‍ය ඕන ම ඉලක්කයක් කඩඉමක් ජය ගන්න පුළුවන් නොපසුබස්නා උත්සාහය, අසීමිත කැපවීම හා අධිෂ්ඨානය තියෙනවා නම් එම ඉලක්ක සපුරා ගන්නවා කියන එක ඒ හැටි දෙයක් නෙවේ.....’ රවිඳු හේෂාන් Nice View ෆිලුම හඳුන්වා දෙමින් ලියූ එයාගේ ලිපියේදී කියලා තියෙනවා.

ඒක ඇත්ත තමයි රවිඳු, නීතියක් රීතියක් තියෙන රටකදී නං... සාධාරණත්වය යම්තාක් හරි අගයන රටකදී නං...
ශ්‍රී ලංකාවේ අපට; විශේෂයෙන්ම තරුණ පරම්පරාවට අද නොනවතින අරගලයක් කරන්න වෙලානෙ තියෙන්නේ- එහෙව් රටක් ඇති කර ගන්න.

මට දැනෙන- පෙනෙන තරමින් නං අද ඉන්නේ එයාලගේ ඉලක්ක ලේසියෙන් අතාරින්නෙ නැති තරුණ පරම්පරාවක්. එයාලගේ වෑයම මල්ඵල ගැන්වෙන ලොකුම පියවරක් සාර්ථක වෙන හැටි දකින්නයි මම නං මේ දවස්වල පෙරුම් පුරමින් ඉන්නේ෴0෴