ප්‍රේමණීය චාරිකාවක් - පළමුවෙනි කොටස

සම්මතයෙන් ඔබ්බට ගිය අසම්මත ආදර කතාත් තියනවානෙ....

‘ගෝලාකාර ලෝකේ ඉන්න විවිධාකාර මිනිස්සු එක්ක පුදුමාකාරව ජීවිතේ ගත කරන කාලයක....

ඒ විවිධාකාර පුද්ගලයන් විවිධ විදිහට ආද‍රේ බලාපොරොත්තු වෙනවනෙ.
සම්මතයෙන් ඔබ්බට ගිය අසම්මත ආදර කතාත් තියනවානෙ.

ඒ ගැන තවත් පුද්ගලයන් වෙනස්ම කෝණයකින් බලලා ගරහන අවස්ථාත් නැතුවා නොවේ; ඒත් ආදර කතාවක් ඒවායින් නවත්වන්න හැකි වෙයිද?
නීතියකට පුළුවන් වේවිද ආදරයකට හරස් වෙන්න?
කෙනෙක්ට පුළුවන්ද තවත් කෙනෙක් සිතන පතන ආකාරය වෙනස් කරන්න?
අසම්මත නිසා තමන් ආදරය කරන පුද්ගලයාව සිතින් යටපත් කරන්න පුළුවන්ද?
අසම්මත වුණත් ආදරයට කියන්න වෙනත් නමක් තියනවාද?’

මගෙ අම්මෝ! ප්‍රශ්නයක් දෙකක් නෙවෙයි ප්‍රශ්න පත්තරයක් කියලද හිතුවේ.
ඒත් මොකෝ, ජීවිතේ කියන්නෙ උත්පත්තියේ ඉඳලා- මරණය තෙක්ම නොනැවතී ඉදිරිපත් කෙරෙන ප්‍රශ්න මාලාවක්. දැනුවත්ව හරි නැතිව හරි අපි එව්වාට උත්තර හොයනවා; විසඳුම් දෙනවා. සමහරක් හරි යන උත්තර, සමහරක් වරදින එව්වා.
ඒත් ජීවිතේ නවතින්නෙ නෑ, ඔහේ ඉදිරියට ගලාගෙන යනවා....

‘ජීවිතේ ගංගාවකී - දෛවෙ එහි දිය පාරකී
 ජීවිතේ ගංගාවකී
 ඒ ගඟේහී පාවෙනා - පිදුරු කැබලිය ලෝ දනා//
 එකට එක්වී - ටික දුරක් විත්
 ආයෙ වෙන්වී යයි වහා....’
ලතා වල්පොල ගැයුවා මතකයිද ‘පුරුෂ රත්නය’ චිත්‍රපටියට. ගොඩ දෙනෙකුට ඒක මතක හිටින්න නං විදිහක් නෑ, පුරුෂ රත්නය ආවේ 1959 අවුරුද්දෙනේ....

සුනිල්වන් නිලෙන් දිලෙන දීප්තිමත් අහසෙ නිරුවත් පා යුවලක් දිස් වෙනවා.

එක-එක්කෙනා ජීවිතය දිහා බලන්නේ වෙනස් වෙනස් විදිහට. එක-එක්කෙනා කිව්වමත් එකිනෙකාට වෙනස්නෙ නේද?

ඉතිං, අද පෝස්ටුවේ මුලින්ම කියපු ‘ප්‍රශ්න පත්තරේ’ මං ලියපු එකක් නෙවෙයි.
xxx xxx ලිව්ව එකක්.... ටක්කෙටම කියනවා නං, xxx ලියපු එකක පේළි කිහිපයක්.
‘නිදිගෙ පංච තන්තරේ’ පෙරළන්නට එන දයාබර හිතවතුන්ට නං, මේ අඩවියේදී මීට ඉස්සර xxxව හම්බ වෙලා නෑ. මාත් මේ ළඟදී එයාව හඳුනා ගත්තේ, නොදැක; හමු නොවී; ලියන-කියන දෙයින් විතරක්!

xxxව මුණ ගැහෙන්නට මඟ පෑදුණේ වික්ටර්ස් හරහාය!

සුනිල්වන් නිලෙන් දිලෙන දීප්තිමත් අහසෙ නිරුවත් පා යුවලක් දිස් වෙනවා. ඒවා චලනය වෙන්නේ පිහාටුවක් පාවෙන තරමේ හෙමිං..... ඉහළ පහළ යන චලන කිහිපයකට පස්සේ වේගය වැඩි වෙනවා, හිටි ගමන්. ආ.... fit කොල්ලෙක් පොලා පනිනවා. (දන්නවනේ, එහෙම කිව්වේ මගේ දැනීමේ තරමටය.
නිකමට වාගේ අයස්මන්ත දොස්තර මහත්තයාගෙන් ඒ පොලා පැනීම ගැන ඇහුවාම, ඒ සෙල්ලමට කියන ඉංග්‍රීසි වචනය කිව්වේය. Trampoline.) මුලින් දර්ශන ටික තිබිලා තියෙන්නෙ slow මෝෂන්වලින්, එතකොට තමයි අපටත් ඒ පාවීම දැනුණේ....
ඊළඟට මෙන්න බොලේ අර හාදයා හැටට-හැටේ ෆුට් සයිකලය පාගනවා.
අපට හිතෙන්නේ එහෙම කරන්නේ ව්‍යායාමයට කියලාය.

අනේ, වැරදිලානේ. ඒ හාදයා වැඩට යන්නේ සයිකලයෙනි. වැඩ කිව්වාට මහ ලොකු සුදු කරපටි රස්සාවකුත් නොවේ; ගෘහ භාණ්ඩ හදන තැනක කම්කරු වැඩක්.
වැඩ අහවර වුණු ගමන් මේ හාදයා මල් පොකුරකුත් අරගෙන දුවන්නේ ඉස්පිරිතාලෙටය.

තම ශක්තිමත් සිරුර ගැන උනන්දු වෙන ඔහුගේ උදරයේ මාංශ පේශි දැනටමත් පමණට වඩා වැඩි වෙලා වගේද?

ඒ රෝහල් ඇඳකටම සින්නවී; සේලයින් වතුරෙන් ජීවත් වෙන මහලු කාන්තාවක බලන්නටය. මල් ගෙනනවාවත්, වික්ටර්ස් ඇගේ නළලතට හාදුවක් පිරිනමනවාවත්, ගිලන් ඇඳ මතින් වාඩිවී ඉන්නවාවත් මහලු කත නොදනී.

ඔහු; වික්ටර්ස් එතරම් සුවපහසු දිවියකට හිමිකරුවෙකු නොවෙන බවත්, ඉන් පස්සේ අපට පෙනෙයි.

තම ශක්තිමත් සිරුර ගැන උනන්දු වෙන ඔහුගේ උදරයේ මාංශ පේශි දැනටමත් පමණට වඩා වැඩි වෙලා වගේද? ඒවාම සොයමින් ඉඳලාත් බැරිය. රෑට යමක් උයා ගන්නටත් තිබේ. ටෙලිෆෝනය නාද වෙන්නේ එතකොටමය.

හරිම අපූරු film එකකට, නියමෙටම ගැළපෙන උපසිරසි යොදන xxx, මෙන්න මෙතැනදී sub එකක් විදිහට කොටන පළමු වචනය ‘ඔව්’ කියන එකය.
The Man with the Answers චිත්‍රපටයට උපසිරසි සපයන xx xxxට ‘ඔව්’ වදන කොටන්නට film එක පටන් ගෙන විනාඩි 4 තත්පර 27ක් යනතුරු බලා හිඳින්නට සිදුවී තිබේ.

මම චිත්‍රපට හදන්නෙක් නොවෙමි; විචාරකයෙක්ද නොවන්නෙමි. එහෙත් මට වදින ෆිලුමක් බැලුවාම; මට දැනෙන ෆිලුමක් බැලුවාම, හැකිතාක් දෙනා එය බලනවාට කැමැත්තෙක්මි. ඇත්තම කියතොත්, මේ ෆිලුම මාව උස්සලා පොළොවේ ගැහුවා වගේ.....
නෑ, නෑ, නෑ. ඒ උපමාව මෙතනට හරි යන්නේ නැත; දරදඬු වැඩිය. කොහොමද ‘බූරු ඇඳක වැතිරී හිටි මං වහන්සේව ඔසොවාගෙන ගිහින් සුවපහසු මෙට්ටයක් උඩට අත හැරියා වගෙයි’ කිව්වොත්? ග්‍රාම්‍යයිද....

සිනමාව තියෙන්නේ රූපාවලියකින් කතන්දර කියන්නටය. ප්‍රධාන වශයෙන්ම කැමරාවෙන් කෙරෙන ඒ කටයුත්තේදී ආලෝකය, වර්ණ, දුර-සමීප රූ වගේ ගොඩාක් දේවල්වලින් ප්‍රයෝජන ගැනෙයි. ඉස්සර නම් සිනමා කැමරාවෙන් ඒ දර්ශන සිර කර ගත්තාය කිව්වේ, සෙලුලොයිඩ් පටිවලය. දැන් වෙනස්- දියුණු තාක්ෂණික මෙවලම්ය භාවිත වෙනවයි කියන්නේ.)

අනෙක් තැන්වලදීත් තෝරා ගැනෙන්නේ වැරදි මිනිසුන්වය.

ප්‍රේක්ෂක අපට පෙන්විය යුතු දර්ශන මොනවාද කියලා තෝරාගෙන කපලා- කොටලා- ඉවත් කරලා- පුරුද්දලා ඉවර වුණාම තමයිලු, සංගීතය යොදන්නේ. සමහරවිට දෙබසුත්... ඒවායෙන් අපේ හැඟීම් තවත් උද්දීපනය කළ හැකිය.

සමා වෙන්නෝනි! මේ කියන්නේ අපේ රටේ වැඩි දෙනෙක් බලන මෙගා ටෙලි ගැන එහෙම නෙවේ. ඒ වැඩි හරියක් ‘ගුවන් විදුලි නාට්‍ය’ය. රූප නොදැක්කාට කමක් නැත. දෙබස්වලට කන් දුන්නාම ඇතිය. වැඩි හරියක්ම එහෙම වෙද්දී වෙනස්ම එව්වාත් රූප පෙට්ටියට එයි.
එතකොට නං නිකම්ම නිකං ඉන්නට බැරි නිසාය ‘වීරයා ගෙදරද?’ වගේ; ‘තණමල්විල කොල්ලගෙ යටිබඩ’ වගේ posts මගෙන් ලියැවුණේ.

වීරයා එකේ චාමර තරම්වත්, තණමල්විල කොල්ලා දීප්ත තරම්වත් ලකයක් නැති කොල්ලෙක් විදිහටයි, මේ ෆිලුමේ Wiktoras මම නං දැක්කේ;

පතෝලයා, කූරා, කිතුලා වගේ මැරෑටියෙකු විදිහටය. ඒ එක්කම මොකක්දෝ හීන් දුකකුත් වික්ටර්ස්ව දකිනකොටම නරඹන්නන්ගේ හදවතට කාන්දු වෙන්නට පටන් ගනියි. The Man with the Answers කාස්ටින් මැනේජර්ලාගේ හපන්කමයි ඒ.

කලිනුත් කිව්වෙමි. අපේ රටේ නොකෙරෙන්නෙත් සුදුසුම අය තෝරා ගැනීමයි! Filmsවලදී විතරක් නොවේ, අනෙක් තැන්වලදීත් අප තෝරා ගන්නේ වැරදි මිනිසුන්වය.

එහෙම කියන්නට නම් ලෙහෙසිය; කෙරුවාවය අමාරු. බොහොමයක් පැතිවලින් බලද්දී, අපේ පුංචි කොදෙව්ව- මහ විශාල රට-රාජ්ජයන් එක්කලා සැසඳීම සාධාරණ නැති බවත් ඇත්තය. ඒත්... පුළුවන් තරමටවත් කරන්නට උත්සාහ ගත යුතු නැත්ද... අනේ මන්දා!
ඉතිං, වික්ටර්ස් දුවන්නේ....

තරහ නැහැනෙ, ඒ දර්ශන පෙළ මගේ වචනවලින් කියනවට. ‘මගේ අවිය’ වචන නෙව!

‘... ඒ රෝහල් ඇඳකටම සින්නවී; සේලයින් වතුරෙන් ජීවත් වෙන මහලු කාන්තාවක බලන්නටය. මල් ගෙනනවාවත්, වික්ටර්ස් ඇගේ නළලතට හාදුවක් පිරිනමනවාවත්, ගිලන් ඇඳ මතින් වාඩිවී ඉන්නවාවත් මහලු කත නොදනී...’

උඩිනුත් තියෙන මේ ඡේදය ආයෙමත් මෙතනට දැම්මේ වැරදිලා එහෙම නෙවෙයි, හොඳේ.

ඒ ඡේදයට වචන විසි හයයි තියෙන්නේ.
ඒ දර්ශන පෙළ තිරයේ දිස් වෙන්නේ තත්ත්පර 32ක් වගේ කෙටිම කෙටි කාලයකදී....
තරහ නැහැනෙ, ඒ දර්ශන පෙළ මගේ වචනවලින් කියනවට.
‘මගේ අවිය’ වචන නෙව!

ඒ රථවාහන තදබදය සහිත වීදියකි. වික්ටර්ස් උදේ සිටම ඇඳගෙන ඉන්නා සරල ඇඳුම පිටින්ම; බෑගය පිටේ එල්ලාගත් ගමන්ම, පාර පනින්නට බලා හිඳී. ඔහුගේ අතේ මල් පොකුරකි. පාර පනින ඔහු ඇතුළු වෙන්නේ මහල් ගොඩනැඟිල්ලකටය.
ඒ බිල්ඩිමේ දොරටුව අසලම සිටගත් වියපත් මිනිසෙක් දුම් පානයට සැරසෙයි. ඔහු රෝගියෙකු බවත්, ගොඩනැඟිල්ල තුළදී දුම් පානයට අවසර නැති බවත් පෙනෙන්නේ, සේලයින් බෝතලයක් එල්ලූ ධාරකයකුත් වැඩිහිටියා අසල තිබීමෙනි.

වික්ටර්ස් පඩි පෙළ තරණය කොට වාට්ටුවට ඇතුළු වෙයි.  අපට පෙනෙන්නේ එහි ඇති ඇඳන් තුනක් විතරය. තුනේම වියපත් රෝගීහු වැතිර සිටිති. තිදෙනාටම සේලයින් බෝතල් සම්බන්ධ කළ ගමන්ය. වික්ටර්ස් යන්නේ මැදින් ඇති සයනය වෙතය.

ඒ කියන්නේ, එක කොටසකට දවස් තුනක වගේ කාලයක් ගියා.

එතැන ඇති කුඩා කබඩ් මේසය මතවූ බඳුනකට මල් පොකුර දමන වික්ටර්ස් පහත්වී, රෝගිනියගේ නළලට හාදුවක් පිරි නමයි; පිරි නමා සයනය මතින් වාඩි වෙයි.

ඇගේ ජීවිත පහන නිවී යන්නට ආසන්නය කියනවාසේ, ඒ ගිලන් සයනයට ඉහළින් ඇති ටියුබ් ලයිටය දැල්වෙන්නේ, නිවි-නිවීය.

මේ දර්ශන ටික රූගත කරන්නට කොච්චර පිරිසක්- කොච්චර කාලයක් ගත කරන්නට ඇතිද? කොච්චර වියදමකුත්....
The Man with the Answers චිත්‍රපටය රටවල් තුනක තුන් දෙනෙකුගේ නිෂ්පාදනයකි! එතකොට වියදම හිතා ගතෑකිය.

‘ඒ කාලේ ටෙලිනාට්‍යයක් කරන විට, සියයට සීයක්ම තිර නාටකය අංගසම්පූර්ණ කරගෙනයි රූගත කිරීම් කරන්නේ. දර්ශන තල හරියටම බලලා වෙන් කරගෙන තමයි රූගත කිරීම් කළේ. මෙහි තිබෙන්නේ කොටස් දාහතක් වුවත්, එය රූ ගත කිරීමට මාස දෙකකට ආසන්න කාලයක් ගත වුණා. ඒ කියන්නේ, එක කොටසකට දවස් තුනක වගේ කාලයක් ගියා. ඒ නිර්මාණය එතරම්ම සැලසුම් කළ නිසයි එතරම්ම සාර්ථක වූයේ. අද කොටස් තුනක් එක දවසට රූ ගත කරනවා....’
අද උදයකාන්ත වර්ණසූරිය මහත්තයා එහෙම කියන්නේ, එදා; 1983 රූගත කළ ‘දිය සුළිය’ ටෙලි නාටකය ගැනයි.

අද එක දවසට කොටස් තුනක්... අපේ කලා නිර්මාණවල ප්‍රමිතිය පහළ බහින එකත් පුදුමයක්ද?

උසස් ගණයේ විදෙස් කලා නිර්මාණවලට අපේ හිත ඇදෙන්නේ, එව්වා ‘තිබ්බා - ගැහුවා’ කුලකයේ නොවන නිසාවෙනි.

එහෙම අය එහාට එන්නෙ අලුත් films ගැන දැන ගන්නයි, නොමිලේම filmsවලට දෙන සබ්ස් අර ගන්නයිනෙ.

‘The Man with the Answers බයිස්කෝප් එක පැය 1 යි මිනිත්තු 25ක ධාවන කාලයකින් යුක්තයි. මෙය අයත් වෙන්නේ Drama, Romance කාණ්ඩයට. මෙම චිත්‍රපටිය නිකුත් වුණේ 2021 ජූලි 20 වෙනි දිනයි. කතාව, නිර්මාණය සහ අධ්‍යක්ෂණය කර ඇත්තේ Stelios Kammitsis විසින් වන අතර ප්‍රධාන චරිත සඳහා රංගනයෙන් දායක වෙන්නේ Vasilis Magouliotis, Anton Weil සහ Stella Fyrogeni යන අයයි. සයිප්‍රසය, ග්‍රීසිය සහ ඉතාලිය යන රටවල රූගත කර ඇති මෙම චිත්‍රපටිය ඉංග්‍රීසි, ග්‍රීක්, ජර්මන් සහ ඉතාලි යන භාෂා හතරෙන්ම සමන්විතයි.’

xxx xxx ‘බයිස්කෝප් සිංහලෙන්’ අඩවියට ලියූ ලිපියේදී කියලා තිබුණා.

xxxගේ ලේඛන ශෛලිය ගොඩක් ආලවට්ටම් නැති; ඍජු එකක්. බයිස්කෝප් අඩවියට එන වැඩි දෙනෙකු ඉලක්ක කර ගන්න ජාතියේ. අනෙක ඒ site එකේ රසිකයන් වැඩි දෙනෙකුත් යෞවන වයසේ අය විත්තියයි commentsවලින් මං තේරුම් ගත්තෙත්.
එහෙම අය එහාට එන්නෙ අලුත් films ගැන දැන ගන්නයි, නොමිලේම filmsවලට දෙන සබ්ස් අර ගන්නයිනෙ. නිමල් දිසානායක වගේ එතැන තියෙන සම්පූර්ණ ලිපියම කියවලා ‘සාහිත්‍ය රසයක්’ විඳින්නවත්, IMDB රේට්ස්සුයි කුණු තක්කාලි අගයයි දෙකම ගණන් අරගෙන; පස් මහ බැලුම් බලන්නවත්  නෙවෙයිනෙ.

හැබැයි සමහර වෙලාවට වැඩි දෙනෙකුට නාල්ලන films වුණත්, මාව නං සසල කළ අවස්ථා තියෙනවා. දන්නවනේ, මං සතියකට films පහක්වත් බලනවා.
හැමදාම වගේ බයිස්කෝප් සිංහලෙන් site එකටත් ගොඩ වැදෙනවා. එහෙව් කෙනෙකුගේ හිත සසල කරවන චිත්‍රපටත් සෑහෙන්න තියෙනවා වෙන්න ඕනේ නේද? තියෙනවා! නමුත් ඒවා සේරම ගැන ලියපං, ලියපං කියලා මගේ හිත වද කරන්නේ නෑ.
ඒත් මෙදා....

සමහරුන් නම් ලියන්නේ බඩගෝස්තරේ උපයා ගන්න.... අපි එහෙමයැ?

ඇයි මගේ හිත එහෙම වද කරන්නේ. මගේ ජීවන අත්දැකීම් ලියන එක ලෙහෙසියි. මගේ හැඟීම් විතරක් ලියන එකත් ලේසියි. සමහරුන් නම් ලියන්නේ බඩගෝස්තරේ උපයා ගන්න.... අපි එහෙමයැ. ලියන්නේ අපේ සතුට උදෙසා.

ඉතිං මේ වගේ post එකක්, මටම හොඳය කියලා හිතෙන විදිහට ලියන්න නම් ගොඩාරියක් ගෙදර වැඩ කරන්න වෙනවා. ඒකට වෙලාව කැප කරන්න වෙනවා.

ඒ වේලාවෙන් ටිකක් ඉතිරි කර ගන්න රුසිත් දිලීප මට උදව් කළා. බයිස්කෝප් site එකේ ලිපි copy කර ගන්න බැරි නිසා ඒවා බලාගෙන, උපුටා ගන්න තැන්වලට ආයෙම අකුරු කොටන්නයි මට වෙලා තිබුණේ.
බ්ලොගය ලියන්න ගත්තු දවස්වල මං අමුම අමු මැට්ටා හිංදා ‘copy paste’ කෙරිල්ලක් දැනගෙන හිටියේ නෑ. උපුටා ගැනීම්වලදී පුදුම පරිප්පුවක් කෑවා මතකයි, ‘සමුදුරු මූර්තිය’ ගැන ලියද්දිත්.

දැන් ටික-ටික එක-එක්කෙනාගෙන් අහගෙන හය-හතරෙන් දශම එක-එක විතර මාත් දන්නවා.
fb එකෙනුත් විස්තර හොයා ගන්නවා.

දන්නෙ නැති වුණත්, මිතුරෙකු නොවුණත් මං xxxට massage එකක් යැව්වා, film එකේ ලිපියේ පිටපතකුයි- සබ්ස් පිටපතකුයි ඉල්ලලා. අනේ, අපරාදේ කියන්න බෑ, ඒවා එව්වා. හැබැයි නුවණක්කාර විදිහට ‘මොනවටද?’ කියන එකත් අහලා දැනගෙන, ඊට පස්සේ.
Wonder ෆිලුම බලලා කැළඹුණු හිතිං ලියූ ‘විරූපීට රැවටෙන්නේ සුරූපී කියලා’ වගේ postsවලිනුත් බයිස්කෝප් සිංහලෙන් site එකට වරදක් නොවුණු බවත් xxx වටහා ගන්න ඇතිනෙ.

සුධා ධවල සීතල හිමෙන් සැරසීගත් කඳු මුඳුනේ කාරය නවත්වන වික්ටර්ස්, අනන්තය දෙස බලා හිඳිද්දී වටහා ගන්නේ ‘මැතියාස්’ යනු තම ජීවිතයේම කොටසක් බවයි. 

‘ඉතිං නිමල්, මේ ෆිලුම ගැන තමුසෙ මෙච්චරටම වහ වැටුණේ ඇයි?’
“ඒක හොඳ හින්දා....”

‘හොඳයි කිව්වේ....?’
“හො..ඳ..යි කියන්...නේ හො-ඳ හින්දනේ....!”
‘තමුසෙගෙ නළවන කතන්දරයි, වචන හරඹයි තියා ගන්නවා තමුසෙටම. ඔය වගේ උත්තරවලින් තමුසෙට අනිත් අයව තම්බන්න ඇහැකි වෙයි. මාව නෙවෙයි.’ යටි හිත කියන්නේ කිණ්ඩි හිනාවකුත් එක්කමය.

මම මගේ ඇතුළාන්තයට එබෙමි; යටි හිතට එබෙමි.

සහතික ඇත්තය. මේ දිනවල මා බ්ලොගයට ලියමින් සිටියේ posts මාලා දෙකකි. මවිසින්ම රචිත ‘හිනා වෙන්න හිනා’  පොතේ කතන්දර ඉදිරිපත් කිරීම එකය. දෙවැන්න ‘දාහතර වෙද්දී’ය. දාහතර වෙද්දී මට ලැබුණු අතිශය සංවේදී අත්දැකීමක් මගේ ජීවිතයට බෙහෙවින් බලපෑ බව මම පිළිගනිමි. (නොඑසේ නම් මා දීඝායුගේ නමේ මුල් අකුරෙන් අපේ චූටි නංගීටත්, බඩා මල්ලාටත් දීපානි- දීපාල් කියා නම් යොදන්නේ නැත.

බණ්ඩාරවෙලදී මට දීඝායු හමු වීමෙනි; ඒ අත්දැකීම් මාලාව ඇරඹුණේ. දැනටමත් ඒවායින් බොහොමයක් එම posts කියවා ඇති ඔබ දනියි. ඒ දිනවල මගේ මනෝ භාවයන්... සිතුම්-පැතුම්.... කෙසේ වීද?

The Man with the Answers චිත්‍රපටය ඒවා යළි මට සිහි ගන්වයි!

‘ඔන්න ඔහොම ඇත්ත කියපං! ඒ නිසයි නිමල් උඹ මේ film එකට ඔච්චර කැමති!’

Film එකේ 59 වෙනි විනාඩියෙදී, ‘වික්ටර්ස්’ බැවේරියාවේ සීත කඳුකර පාරක මැතියාස්ව‌ තනිකොට දමා පලා යන්නේ තරහෙන් පුපුරමිනි.
සුධා ධවල සීතල හිමෙන් සැරසීගත් කඳු මුඳුනේ කාරය නවත්වන වික්ටර්ස්, අනන්තය දෙස බලා හිඳිද්දී වටහා ගන්නේ ‘මැතියාස්’ යනු තම ජීවිතයේම කොටසක් බවයි.
ඔහු නැවතත් මැතියාස් සොයා එයි. 62 වෙනි විනාඩියෙදී වික්ටර්ස් මැතියාස් වැලඳ ගන්නේ හද පිරුණු සොම්නස නොසඟවමිනි.

ඔහුගේ ළය මඬලේ හිස රුවාගන්නට මට උවමනා විණි. එහෙත් මට එය කළ නොහැකි විය. මෙදා වික්ටර්ස් එය කරන විට....

එදා රණවක නිසා අසරණව හිඳිද්දී පිහිටට පැමිණි දීඝායුට සමීප වෙන්නට, ඔහුගේ ළය මඬලේ හිස රුවාගෙන හඬන්නට මට උවමනා විණි. එහෙත් මට එය කළ නොහැකි විය.

මෙදා වික්ටර්ස් එය කරන විට, මැතියාස් තම සගයාව තුරුළු කර ගන්නා විට එතැන හිඳින්නට ඇත්තේ මාද?

කෙනෙකුට අනුව The Man with the Answers යනු සමරිසි චිත්‍රපටයක් විය හැකිය. මගේ දැනීමේ හැටියට, ශ්‍රී ලංකාවේ මෙම තේමාව යටතේ නිපදවී තියෙන්නේ එකම එක film එකක් විතරය. ‘මලට නොඑන බඹරු’. එවැනි තේමාවන් අපට අරහංය. අප සිල්වත් මහෝපාසකයන්ය; හීනෙන්වත් වැරදි නොකරන්නවුන්ය. නිකෙලෙස් ඇත්තන්ය; කියනවා නම් තව දිගට කිව හැකිය!

එහෙත්, මට නම් ‘පිළිතුරු දන්නා මිනිසා’ චිත්‍රපටය අසම්මත ආදර අන්දරයක් පමණක් නොව ජීවිතයද විවරණය කෙරෙන්නකි.

‘සම්මතෙන් එහා ගිය
අසම්මත බැඳීමක්....

ඒත්,
ආදරයට කොහෙද
සීමා මායිමක්....

හැඟීම්
ආධ්‍යාත්මික නම්
කොහේද එතන
අසම්මතයක්...

ආදරය
අසීමාන්තිකයි....

මුළු කතාවම නං කියන්න නෙවෙයි මගේ අදහසත්. ඒත්...

එනිසයි ඔවුන් ළඟ
මෙතරම් ප්‍රේමයක්....’

බයිස්කෝප් සිංහලෙන් අඩවියට xxx සපයා තිබුණු ලිපිය අවසන් කරලා තියෙන්නේ එහෙමයි. ඒත් මගේ පෝස්ටුව නං අදම ඉවර කරන්නෙ නෑ රජෝ. පළමුවෙනි කොටස විතරයි මේ අවසන් කරන්නේ.

Film එක පැයයි විනාඩි 25ක් දිගයි කියලා දැනටමත් ඔයාලා දන්නවනේ. මුළු කතාවම නං  හිතාදර ඔයාලට කියන්න නෙවෙයි මගේ අදහසත්. ඒත් මේ අපූරු සිනමා සිත්තමේ හැඩරුව ලියන්න වෙන්නෙ තව එක කොටසක්වත් අරගෙනයි.
මොකද දන්නවද?

දාහතර වෙද්දී පෝස්ටු මාලාව ඉවර වුණාට පස්සේ ලියන්නට හිතාගෙන ඉන්න ‘පහළොවේ සිට....’ postsවලටත් මේ කතන්දරේ කියවෙන දේවල් සමීප නිසා!

එහෙනං... අදට.....