සොබා දහමට වෙමුද අවනත...

පහුගිය සෙනසුරාදා; ඒ කියන්නේ 2025 නොවැම්බර් 22 වෙනිදා පාන්දර පහමාරට අපේ ගෙදරින් පිටත් වුණේ නුවර යන්න. Pra Jay මහතාගේ Double Cab වාහනේ. Blogවලට සම්බන්ධ පස් දෙනෙක් වාහනේ හිටියා. පැණිදෙනියේ ඉන්න තවත් බ්ලොග්කරුවෙක්; රවී වීරසිංහ කටුගස්තොටදී අපට එකතු වෙන්නයි plan කරගෙන තිබුණේ.

ඒ වෙද්දී දිත්වා ගැන මෙලෝ දෙයක් මම නං දැනං උන්නේ නෑ. අනිත් හතර දෙනාත් ඒ ගැන වැඩි අවධානයක් දුන්නැතිවා වගෙයි.

අපි නාරම්පනාවේ, විමලරත්න කුමාරගම කවියාගේ සොහොන ළඟ හිටිද්දි- කුමාරගම මහත්තයාගේ ඥාති පුත්‍රයෙකු තමයි සොබාදහම වියරු වැටීගෙන එන විත්තිය කිව්වේ. “මහත්තයලට නුවර පාරෙන් නං දැන්ම ආපහු කොළඹ යන්න බැරි වෙයි. පහළ කඩුගන්නාවේ නායක් ගිහින් ගලකුත් පෙරළිලා පාර වැහිලලු.”
ඒ කිව්ව විදිහටම එදා අපි සකල අමාරුවක වැටුණා- ආපහු කොළඹට එද්දී. අනෝරා වැස්සේ, රෑ ජාමයක් වෙනකල් විකල්ප පාරවල් හොය- හොයා ආවේ නියම පරිප්පුවක් කාලා.

ඉරිදා පාන්දර ඉඳලා දවස ගෙවුණේ පුදුම දුකකින්. අහන්න දකින්න ලැබුණේ සොබාදම් දිනිතිය කෝපයෙන් පරල වෙච්ච හැටි. දැනුත් ඉරිදා; 30. සතියක් තිස්සේ එහෙම දැක්ක දෙයින් අංශු මාත්‍රයක් වාර්තා කරලා තියන්නයි හදන්නේ.

රට පුරාම නාය යෑම්...

දුප්පත් පොහොසත් වෙනසක් නැතිව ගෙවල් දොරවල්වලට හානි....

යාන වාහනත් යට කරගෙන පස් කඳු රූටාගෙන ඇවිත්...

පාරවල්වල පදාස පිටින් නැතිව ගිහිං...

මහාමාර්ග වාරිමාර්ග වෙලා...

විදුලි- දුරකථන සබඳතා බිඳ වැටිලා...

පොඩි පටු ගංවතුරක් නෙවෙයි ගැලුවේ! ගඟට අඩි 80ක් විතර උඩින් තියෙන ගැටඹේ පන්සලත් යට වුණා කිව්වම...

දෙවියන් පවා අහක බලන්නැති. සමන් දේවාලේ ගාවටම ගලලා...

යකා පාලමටත් යකා ගහලා...

රට පුරාම කෝච්චි දිවිල්ලත් නවත්තන්න වුණයි කිව්වම හිතා ගන්න ඇහැකිනෙ තත්ත්වේ!

මිනිස්සු ආරක්‍ෂිත ස්ථානවලට ගිහින් තිබුණේ සුනඛ ආරක්ෂකයන්ට ගෙවල් බලාගන්න කියලයි!!! (පව්... බල්ලොනෙ!)

අධිවේගී මාර්ගවල ගමනාගමනය කෙරෙන වාහනවලින් මුදල් අයකිරීම නැවැත්තුවා... Mobitel, Dialog, Airtel, Hutch  දුරකථන සමාගම්වලිනුත් නොමිලේ ඇමතුම්වලට හා SMSවලට ඉඩ දුන්නා...

TV චැනල්ස් පවා එයාලගෙ සුපුරුදු වැඩ සටහන් නවත්තලා ‘දිත්වා විපත්’ ගැන කිව්වා.

අහසෙන් පොළොවට වැක්කෙරුණු වතුර කන්දරාව දරා ගන්න බැරි තරං... ජලාශ පිටාර ගැලුවා... වික්ටෝරියාවේ වාන් දොරටු හයක්ම ඇරලා...

රටේ ජනතාව පීඩාවට පත් වෙද්දී ‘මිහිබට දෙවිවරු’-

‘යෝධ බල යෝධ ශක්තිය ඇති විරුවන්’ වගේම

‘සේවයට කැප වුණු දහස් ගණනක හදවත් ඇත්තන්’-

ජාති භේද නොතකා;

ආගම් භේද නොතකා;

පළාත් භේද නොතකා...

මේ විපතේදී හැකි උපරිමයෙන්ම ශ්‍රම-ධන පරිත්‍යාග කරමින් කළේ; තවමත් කරන්නේ අමිල මෙහෙවරක්!!!

ඔබ හැමටම ස්තුතියි, බොහොම පිං!

ගංවතුර බැහැලා යාවි. ඒත් එයින් ඇතිවුණු; ඇතිවෙන්න තියෙන පීඩාවන් බොහොමයි... අනේ පරෙස්සමින්...

රට ආපහු ගොඩ නඟන රාජකාරිය ‘මහමෙර’ටත් වඩා ලොකු එකක් වෙයි. ඒකට අපි කාගෙ-කාගෙත් උදව් ඕනි වෙනවාමයි. පුළුවන්කමක් තියෙන විදිහට...

අප හැමටම සෙත් වේවා෴0෴