ප්‍රේමණීය චාරිකාවක් - දෙවෙනි කොටස

මුළු කතාවම නං කියන්න මගේ කොහෙත්ම අදහසක් නෑ. ඒත්....

Film එක පැයයි විනාඩි 25ක් දිගයි කියලා දැනටමත් ඔයාලා දන්නවනේ. මුළු කතාවම නං කියන්න මගේ කොහෙත්ම අදහසක් නෑ. ඒත් සියලු රස කලතා දෙන ඉනාවක් නිසා තව ටිකාක් විස්තර කියන්නං, ඊළඟ කොටසෙන්. මොකද දන්නවද? දාහතර වෙද්දී පෝස්ටු මාලාව ඉවර වුණාට පස්සේ ලියන්නට හිතාගෙන ඉන්න ‘පහළොවේ සිට....’ postsවලටත් මේ කතන්දරේ කියවෙන දේවල් සමීප නිසා!

මේ ලිපියේ පළමුවෙනි කොටසෙදී මං එහෙම කිව්වා.

‘දාහතර වෙද්දී’ පෝස්ටු පෙළ ලියලා අහවරයි!
‘පහළොවේ සිට..’ ලියන්නේ මේ කොටසත් ලියා ඉවර කරලා!!

වික්ටර්ස්ට තාවකාලික රස්සාවත් නැති වෙයි. ගිලන්ව හිටි ආච්චි අම්මාත් එලොව යයි. වික්ටර්ස්ගේ අම්මා වෙනත් රටක ඉන්නා බවත්, ඇය තවත් විවාහයක් කරගෙන පුතෙකුත් ලබාගෙන සිටින බවත් ප්‍රේක්ෂක අපට කියවෙයි.
‘මේ ඉරිදා එයාගේ උපන් දිනේ.... සාදයක් ලෑස්ති කරන්න තියෙනවා...’ නැන්දම්මාගේ මළගමට නොඑන බව අම්මා වික්ටර්ස්ට කියයි.
අවමඟුල් කටයුතු ඉවර වෙද්දී වික්ටර්ස් අතේ සල්ලිත් ඉවරය! 

එතැන දක්වාම කියවෙන්නේ film එකේ මුල් විනාඩි දහයක කාලයේදීය. අපේ මෙගා නාටකයක නං ඔය ටික කියන්නට විනාඩි 17 එපිසෝඩ් හත-අටක්වත් වැය කෙරෙයි.
වික්ටර්ස් මුදල් හොයා ගන්නේ එතෙක් සුරැකිව තියාගෙන ඉන්නා රන් පදක්කම් තොගයක් විකුණා දැමීමෙනි.

කතාවේ රසය කුළු ගැන්වීමට යෙදෙන එක් උපක්‍රමයක් මෙතැන ඇති විත්තියකි, මට පෙනුණේ. ඒ පදක්කම් මොනවාද කියා එතැනදී එළි කෙරෙන්නේ නැත. විනාඩි බාගයකදී; තත්ත්පර 30ක කාලයකදී ඒවා විකුණලා සල්ලිත් හොයාගෙන වික්ටර්ස් කොහේදෝ යන්නටත් සූදානම් වෙයි! ඒ දූවිලි කකා තිබුණු පරණ Audi කාර් එකකිනි!!

මාගේ මේ ව්‍යායාමය හුදෙක් රජ සැප පිණිස නොව, පළමුකොට මගේම සතුට උදෙසාය.

‘.... මෙම බයිස්කෝප් එකේ කතාව දිග හැරෙන්නේ තරුණ වයසේ කිමිදුම් ශූරයෙක් පාදක කරගෙනයි. ඔහු තමන්ගේ මවගෙන් වෙන්වෙලා ජීවත් වන්නේ. හදිසි කාරණාවක් හේතුවෙන් මේ තරුණයාට තමන්ගේ මව බලන්න යන්න සිදු වෙනවා. ඒත් මව ජීවත් වෙන්නේ තවත් රටක. ඒ නිසා මේ තරුණයාට ලොකු චාරිකාවක් යන්න සිදු වෙනවා. ඒ අතරතුරදී ඔහුට හරිම අපූරු අමුත්තෙක් මුණ ගැහෙනවා අහම්බයෙන්.’ බයිස්කෝප් සිංහලෙන් අඩවියට මේ ෆිලුම ගැන ලියන xxx xxx එහෙම- බොහොම කෙටියෙන් තමයි ලියලා තිබුණේ.

xxx ලියන්නේ film එකක් හොයාගෙන එන සිනමා ලෝලීන්ට; එයාලගේ ඔර්ඩියන්ස් එකට.
නිදි එහෙම නොවේ!
‘මාගේ මේ ව්‍යායාමය හුදෙක් රජ සැප පිණිස නොව, පළමුකොට මගේම සතුට උදෙසාය.
දෙවනුව සාහිත්‍ය රසකාමී ඔබට කලාත්මක සිනමා පටයක් හඳුන්වාදී එය රසාස්වාදනය කරවනු සඳහා ඔබ පොළඹවන්නටය.
තෙවනුව එමඟින් ඉදිරි blog post එකකින් මා කියන්නට සැරසෙන අසම්මත යැයි කිව හැකි කතන්දර කිහිපයකට පදනමක් දමා ගන්නටය.’
කියා ඇත්තම ලියමින්, නිදිගෙ පංච තන්තරේ රසික-රසිකාවනට ආදරයෙන් දන්වා සිටිමි.

‘.... ඒ අතරතුරදී ඔහුට හරිම අපූරු අමුත්තෙක් මුණ ගැහෙනවා අහම්බයෙන්.’ xxx කියන ඒ අමුත්තා; කඩවසම් මැතියාස් අප ඉදිරියට එන්නෙ විමසිලිමත් හොරෙකු ලෙසිනි!

ඉතාලියේ සිට ග්‍රීසියට යන නෞකාවේ ආපන ශාලාවෙන් සැන්ඩ්විච් එකක් ගන්නට යන වික්ටර්ස්ට කල්පනා වෙන්නේ තමන් එතරම් පොහොසතෙකු නොවෙන බවයි. කුසගින්න නිවා ගැනීමට වතුර බෝතලයක් විතරක් මිලදී ගන්නා මේ ‘අසරණ තරුණයා’ දෙස බලා හිඳින්නේ මැතියාස්ය.

මැතියාස් සැන්ඩ්විච් එකක් හොරකම් කර වික්ටර්ස්ට පිරිනමයි.
‘එපා! ඔයා ඕක හොරකම් කළා!’ කියන වික්ටර්ස් මැතියාස්ට තමන් ගැන විස්තර පවා වසංගයි; බොරු කියයි. 

කොච්චර බඩගිනි වුණත් සිංහයො තණකොළ කනවද?

  ග ජ කු ම්  බිඳින  එකසර  කෙසරිඳු         බලැති
  කොතරම් සා  වුවත්  තණ  කබල          නුබුදති
  වි හි ගු ම්  කුලෙන්  යුතු  උතුමෝ      අබිමනැති
  කොතරම් වුවත් නොතරම්කම් නොම   කෙරෙති

‘සුභාෂිතයේ’ එහෙම කියන බව වික්ටර්ස් දන්නෙ නැතිව ඇති. ඒත් ඉසුරුමත් ඉතාලියේ ඉන්නා ඒ දුප්පත් හාදයාටත් ප්‍රතිපත්තියක් තියෙන බව; බඩගින්නේ හිටියත් හොරකම් කරලා නොකන බව, ලෝකෙන් උතුම් රට වන සිරි ලංකාවේ අපටත් දැක ගන්නට ලැබෙයි.

අපේ ජීවිත ඒකාකාරී නොවන්නේ ගැටුම්, ප්‍රශ්න, බාධක මතු වෙන බැවිනි. ඉහළ යෑම් මෙන්ම පහළ වැටීම්ද සිදු වෙන බැවිනි. අපේ මතවලට හා රුචියට නොගැළපෙන අයගෙන් ඈත් වීමෙන් ගැටුම් වළක්වා ගන්නට හැකිය. එහෙත් දෛවයේ ලියැවී තිබෙන්නේ එවැන්නෙකු හා දිගටම යන්නට නම්... ජීවිත ගමනත් එකට එක්ව යන්නට නම්?

මැතියාස්ට බොරු කියා ‘බාරි’ වරායෙන් පිටවෙන වික්ටර්ස්ට බැවේරියාවට පාර කියන්නට ඉදිරිපත් වෙන්නේ මැතියාස්මය; හිතේ කහටක් නැතිවය. ඔහු නිරායාසයෙන්ම වාගේ අනෙක් අයගේ ජීවිතවලට ඇතුළු වන්නේ, බලපෑම් කරන්නේ අතිශූර ආකාරයෙනි. ඊට උදව් වෙන්නේ මැතියාස්ට තිබෙන ‘අනුන් සිතැඟි වටහා ගැනීමේ හැකියාව’යි.

“... ඔයාට ඕනි කාර් එකේ තනියම යන්න. මට පැහැදිලිවම තේරුණා.
ඔයා ටවුමෙන් එළියට යන්න දන්නවානෙ?
අර පේනවද? අර දකුණු පිටවුම.
දකුණු පැත්තට යන්න,
රෝහල පහු කරන්න....
වටරවුම හරහා දකුණු පැත්තේ දෙවෙනි පිටවුමෙන් යන්න,
ඉයුජින් ලුයිගි පාරෙන්.
ඊළඟ වටරවුමේදී, තුන්වෙනි පිටවුමෙන් යන්න.
මම සිය පාරකට වැඩිය ඔය පාරෙන් ගිහින් ඇති. සුපිරි පාරක්.
ඔයා යන්නෝනි පාර දන්නවානෙ.
හරි එහෙනම්. පරිස්සමින් යන්න....”

මම නිවැරදි පාරෙන්ද යන්නේ කියලා ඔයා බලන්න.” වික්ටර්ස් කියයි. “නිවැරදි පාරක් නෑ.” මැතියාස් උත්තර දෙයි.

නොදන්නා රටකට ගොඩ බහින වික්ටර්ස්ට මැතියාස් එලෙස පාර කියා දෙයි. එනමුදු ‘මාත් ඒ පැත්තටම යන නිසා මාවත් දමාගෙන යන්න.’ යැයි කියලා බාල්දු නොවෙයි. තමන් සමඟ කාරයෙන් යමු යැයි වික්ටර්ස් යෝජනා කරද්දී වුණත්, එක එල්ලේ එය පිළිගන්නේ ආඩම්බර මැතියාස් නොවේ.

‘අපි ඉන්ධන වියදම දෙකට බෙදාගමු....’ කියලා වික්ටර්ස් කිව්වාමය මැතියාස් වාහනයට නඟින්නේ.

එහේ අභිමානවත් මිනිසුන් එහෙමය. මෙහෙත් එහෙමද?

The Man with the Answers තිර රචකයා චරිත අභ්‍යන්තරයට අප රැගෙන යන්නේ එහෙමය. බිඳෙන්-බිඳ ඔවුන්ගේ ස්වභාවය අපට පෙන්වා දෙන්නේ එහෙමය.
ඔහොම විරුද්ධවීම් අතරින් එකඟවීමේ බීජය රෝපණය වෙන්නට පටන් ගත් විට...

“මම නිවැරදි පාරෙන්ද යන්නේ කියලා ඔයා බලන්න.” වික්ටර්ස් කියයි.

“නිවැරදි පාරක් නෑ.” මැතියාස් උත්තර දෙයි. මේවා හුදු දෙබස් රචනා කිරීමක් පමණක්ද? හුදු අවස්ථා ගොඩනැඟීමක් විතරමද?
අතරමඟ අවන්හලකට ගියාමය පොහොසත් මැතියාස් ‘සූර සරදියෙල් පන්නයේ වැඩක් දෙමින්’ නැවේ අවන්හලෙන් ‘සැන්ඩ්විච්’ හොරකම් කළ හේතුව කියන්නේ. ඒ කියන්නෙත්, වික්ටර්ස් ඔහු එය කියන තැනට තල්ලු කළාමය.

“ඔයා දන්නවද, ඔයාට මෙතනදි හොරකම් කරන්න බෑ.”

“අසාධාරණ විදිහට මිල වැඩි තැන්වලින් විතරයි මං හොරකම් කරන්නේ.”

“ඔහ්....”

“යුරෝ පහක් මිල වුනු සැන්විච් එකේ මෙලෝ රහක් තිබුනේ නෑ. එතකොට කවුද ඇත්තටම හොරා?”

මැතියාස් පෙනුමෙන් වගේම කෙරුවාවෙනුත් ජර්මන් නයිට්වරයෙකු බව; පවත්නා අසාධාරණය වටහා ගන්නා කෙනෙකු බව; හැකි හැම විටම ඊට විරුද්ධව පහර දෙන බව අපට වැටහෙන්නේ ටිකෙන්-ටිකය.

“මම නොහිතපු විදිහට මා වටා බොහෝ රසික පිරිසක් එක්වෙලා සිටිනවා. ෆේස්බුක්, වට්ස්ඇප්, ට්විටර්, ටික්ටොක්, ටෙලිග්රෑම්, ඉන්ස්ටග්රෑම් සහ හැන්ග්අවුට්ස් හරහා මට පණිවිඩ එවන විශාල රසික පිරිසක් නිර්මාණය වෙලා තියෙනවා. ඒ සෑම දෙනාම විවිධ චිත්‍රපටවලට සහ ටෙලි කතා සඳහා සිංහල උපසිරසි ඉල්ලීම් කරනවා. මට හැකි පමණින් එම ඉල්ලීම් ඉටු කරන්න උත්සාහ කරනවා. බයිස්කෝප් වෙබ් අඩවියේ මගේ උපසිරසි සඳහා කමෙන්ට් පළ කරන ධෛර්ය සපයන පිරිසක් සහ සමාජ මාධ්‍ය හරහා මට ධෛර්ය සපයන විශාල පිරිසක් සිටිනවා....

ඒ සමීපකම නිසාම,film එකේ දෙබස්වලට යටින් කියවෙන ‘සැඟවුණු පණිවුඩ දිරවා ගන්නටත්’....

-... මේ චිත්‍රපටියට සිංහල උපසිරසි ගෙන ආවේ 2021 ජූලි 30 වෙනි දිනට මට ලබපු 19 වෙනි උපන්දිනය වෙනුවෙන් ඒ රසික පිරිසට පුංචි ත්‍යාගයක් ලෙසයි.” xxx බයිස්කෝප් සිංහලෙන් අඩවියට සපයා තිබුණු කෙටි ලිපියේ තිබුණා. 

ඔන්න xxx, නිදිගෙ පංච තන්තරේ කියවන රසික-රසිකාවනුත්, ලියන නිදිත් ඔයාට ‘නිදුක් නිරෝගී වාසනාවන්ත අනාගතයක් වේවා’ කියලා සුබ පතනවා. (ටිකක් පරක්කු වෙලා වුණාට කමක් නැහැ නේද!)

xxx වටා රසිකයන් රොක්වීම ඒ හැටි පුදුමයක් නොවේ.

මේ හාදයා උපසිරැසි සපයන්නට තෝරා ගන්නේ ආන්දෝලනාත්මක filmsය. ඒ චරිතවල මුවට නංවන්නේ අප- අප අතරේ කෙරෙන කතාබහය.... මේ චිත්‍රපටයේදී ‘මෙලෝ රහක් තිබුණේ නෑ- එතකොට කවුද හොරා- මකබෑවියන් තෝ- මූණ තළා ගන්න ඕනිද හු#තෝ’ වැනි subs දකිද්දී මට නම් දැනෙන්නේ අපේකමකි.
xxxගේ හපන්කමක් විදිහට මං දකින්නේ එච්චරකුත් නොවේ.
The Man with the Answers චිත්‍රපටයේ ඉංග්‍රීසි, ජර්මන්, ඉතාලි, ග්‍රීක භාෂා හතරෙන්ම කෙරෙන සංවාද තිබෙයි. ඒවා සිංහලයට නැඟීමේදී වුණත් ‘xxx ස’ ෆේල් වෙලා නැත!’

ඒ සමීපකම නිසාම, film එකේ දෙබස්වලට යටින් කියවෙන ‘සැඟවුණු පණිවුඩ දිරවා ගන්නටත්’ සමහරවිට ප්‍රේක්ෂක අපට අමතකව යන තරමය.

“මේ ගමන පටන් ගත්තු වෙලේ ඉඳන්, මට තේරෙන්නේ නෑ ඔයා ගමන රස විඳින්නෙ නැත්තේ ඇයි කියලා.”  ඕනෑම ප්‍රශ්නයක් සැහැල්ලුවෙන් බාරගන්නා මැතියාස් අහයි. මේ අහන්නේ බැවේරියාවට යන ගමන ගැනද, නැතිනම් ජීවන ගමන ගැනද?

“මම අනතුරක ඉන්න නිසා වෙන්න පුළුවන්!” හිනා පොදක්වත් නැතිව තිස්සෙම බුම්මාගත් ගමන් ඉන්නා; කොක්කටම හුරු; වලියටම බර වික්ටර්ස් ප්‍රශ්නයකින්ම උත්තර දෙයි.
“ඔයා අනතුරක?”
“ඔව්.”
“ඔයා වාහනේ එළවන විදිහ අනුව, මම තමයි අනතුරක ඉන්නේ.” මැතියාස් පැහැදිලි කරයි.

මොන ප්‍රශ්නයක් ආවත් දිරිමත්ව;සවිමත්ව හිනාවෙන්- සැහැල්ලුවෙන් ඒවාට මුහුණ දෙන්නට ඕනෑය.

ඒ විවේචනාත්මක කතාවට වික්ටර්ස් උත්තර බඳියි.

“මම මගේ කාර් එකට ආගන්තුකයෙක් දාගත්තා. මම කොහොමද දන්නේ ඔයා දාම-ඝාතකයෙක් නෙවේ කියලා?
මම කොහොමද දන්නේ ඔයා මාව කෑලි කෑලිවලට කපයිද කියලා?
ඒ නිසා වෙන්න ඇති ඔයා ප්‍රධාන පාරෙන් අයින් වෙමු කියන්නේ.”

ඒ කතාවත් මැතියාස්ට විහිළුවකි!
“කෑලි කෑලිවලට කපන්න නම් මට හේතුවක් තේරෙන්නෙ නෑ.
මම ඔයාව නිකම්ම මරලා දැම්මොත් කොහොමද?”

මෙහෙම කතාබහ මට නම් හරිම සජීවීව දැනෙයි. නන්නාඳුනන කෙනෙකු වුණත් මුහුණ එල්ලාගෙන ඉන්නවාට මං අකමැතිය. එහෙම විරුව-පට්ටං ගහගෙන ඉන්නවා, මට නම් පෙනෙන්නට බැරිය. මොන ප්‍රශ්නයක් ආවත් දිරිමත්ව; සවිමත්ව හිනාවෙන්- සැහැල්ලුවෙන් ඒවාට මුහුණ දෙන්නට ඕනෑය. මැතියාසුත් එහෙමය.
එයා පාළු මකා ගන්නා රිසියෙන්, වික්ටර්ස්ට ‘ප්‍රශ්න විස්සෙ’ සෙල්ලම කරන්නට යෝජනා කරයි.
ඒ සෙල්ලම වික්ටර්ස් නොදනී.

මැතියාස් වික්ටර්ස්ට ඒ ක්‍රීඩාව ගැන කියා දෙන අතරේ, අපටත් දැනගෙන සිටීම වටනා කාරණයක් කියයි!
“උත්තරවලට වඩා ප්‍රශ්නවලින් කෙනෙක්ව හොඳින් විනිශ්චය කරන්න පුළුවන්.”

මෙපමණ දේවල් කියවමින් ඉන්නටත් කලින් ‘පිළිතුරු සහිත මිනිසා’ film එක නරඹා සිටින්නට ඔබට සිතී ඇතැයි මට දැනේ. එබැවිනි මේ සෙල්ලම ගැනවත්, එය කෙරීගෙන ගිය ආකාරය ගැනවත් තව මොකුත්ම නොකියන්නේ. නිකම් මොකටද ඔබේ කුතුහලය නැති කර දමන්නේ?

ග්‍රාමීය පාරකදී මැතියාස් වික්ටර්ස්ව රවටා වැවකට...

මේ කතාවේදී අපට හමුවන්නේ ඉතාමත් සීමිත චරිත කිහිපයක් විතරය. සිදු වන්නේත් සීමිත සිදුවීම් කිහිපයක් විතරය. වෙනස් වෙන්නේ පරිසරයන්ය.... හිතන්නේ එහෙම වුණාය කියලා ෆිලුම බෝරින් වෙනවා කියලද? මට නම් විනාඩි 85 යනවා දැනුණේ නැත.

ඉවත දැමිය හැකි ජවනිකාවක් හෝ එකම දෙබසක් හෝ මේ චිත්‍රපටයේ නැත. මෙය නරඹන්නට වෙන්නේ සම්මා සතියෙන්; එළඹ සිටි සිහියෙන් යුතුවය. මතකද මේ පෝස්ටුවේ ඉහළින් ලියවුණා; film එකේ විනාඩි 9 තත්ත්පර 55 සිට 10.44  දක්වා වන තත්ත්පර 49දී කෙරෙන රන් පදක්කම් විකිණීමක් ගැන. ඒ පදක්කම් මොනවාද කියලාත්, වික්ටර්ස්ගේ කනස්සල්ලට හේතුව මොකක්ද කියලාත් හෙළි වන්නට ගන්නේ අහම්බෙනි. (විනාඩි 20කට පස්සෙය.)

ග්‍රාමීය පාරකදී මැතියාස් වික්ටර්ස්ව රවටා වැවකට පනියි; මිතුරා දියට බසින්නට පැකිළෙන විට ඔහු දිරි ගන්වයි.

“...එන්න. අත්දැකීමක් ගන්න.
ඔයා ගිලුනොත් මං බේරා ගන්නම්. පොරොන්දු වෙනවා.”
(මැතියාස් කියන දේ විශ්වාස කරන බව පෙන්වන වික්ටර්ස් නිහඬව ඇඳුම් උනා දමන්නේ දියට  බසින්නටය. එයින් මැතියාස් උදම් වෙයි.)
“හොඳ කොල්ලා.
පනින විදිහ කියල දෙන්න ඕනෙද ?
දණහිස් තරමක් නමන්න, ඔයාගේ බර ඉස්සරහට විසි කරන්න.
කකුල්වලින් තල්ලුවක් දෙන්න. එහෙම කරේ නැත්තම් ඔයාව අනිත් පැත්තට වැටෙයි.
මම විශිෂ්ට ගුරුවරයෙක්. එහෙම නේද?”

ඔයාගේ හෝමෝන හොඳින් ක්‍රියාකාරී වෙනවා. ඒ එක මොහොතකින්...

මැතියාස්ට අනුමාන කරන්නට ඉඩදී, මහමෙරසේ නිසලව ඉන්නා වික්ටර්ස් (ෆිලුමේ 45 වෙනි විනාඩියෙදී) තමන් ගැන යමක් හෙළි කරයි.

“... මම පලවෙනි පදක්කම දින්නේ මෙතනදි.” එහෙම කිව්වාට පස්සේ වික්ටර්ස්ට උවමනා කරන්නේ සුපුරුදු පිහිනුම් තටාකය ළඟ හුදෙකලා වන්නටය.

පෙර එක දවසක, ඔහුව කිමිදුම් ශූරයෙකු කරවන්නට ආසාවෙන් හිටියේ අම්මාය. ගුවන් නියමුවෙකු කරවන්නට බලා හිටියේ මිත්තණියය.
මේ අන්ත දෙක සංසන්දනය කරමින් ගළපන්නේ මැතියාස්ය.

“... ඔයා මේ විදිහට වාතයේ ඉන්න එක ඇදහිය නොහැකි දෙයක්.
ඔයාගේ හදවත පිස්සුවෙන් වගේ ගැහෙනවා.
ඔයාගේ හෝමෝන හොඳින් ක්‍රියාකාරී වෙනවා.
ඒ එක මොහොතකින්... ඔයා පියාසර කරනවා. පිහාටුවක් වගේ සැහැල්ලුවෙන්. ගුරුත්වාකර්ෂණය ඔයාව නැවත ඇද ගන්නා තෙක්....
ඔයාට මතක් වෙනවා ඔයාට පැන යා නොහැකි බව. ගුරුත්වාකර්ෂණය හැමවිටම ඔයාව බිමට ඇදලා දානවා.”

‘නිමල්, නිමල්, නිමල්! ඔය විදිහට ෆිලුමේ තියෙන වචන විතරක් කිව්වම හරි යනවද? Film එකක් කියන්නේ වචන විතරක් නෙවෙයි නේද? රූප... ශබ්ද සේරමත් ඕනි නේද?’
මගේ යටි හිත අසයි.
ඇත්ත, සහතික ඇත්ත.
(ඔයාලට මතක ඇතිනේ, ‘ප්‍රාණවත් සංවාදවලට මගේ ඇති අභිරුචිය’ ආදර පූජාසනේ postsවලදී ලියැවුණු හැටි. ඒ නිසාම වෙන්නැති දෙයියනේ චිත්‍රපටය නැරඹුවාට පස්සෙත් මේ සංවාද මගේ සවනේ දෝංකාර දිදී රැඳී තියෙන්නේ.)

-ඔයා මොකක්ද කරන්නේ? මරණවද ඇයව? ඊට පස්සේ මං ඇයගේ ඔලුව චප්ප කරලා, ඇයව කෑලි කෑලිවලට කපනවා. ඔව් ද නැත් ද? ව්‍යාකූලයි. ඔව්!!!!

“ඇන්ජලිකී ලෝට්ස් කියන්නේ කවුද?
හරි, කවුද ඇය?

ඇය ඔයාගේ පෙම්වතියද?
නෑ, ඇත්තෙන්ම නෑ. මම දන්න කෙනෙක්.
ඇය ඔයාගේ අම්මද?
ඔව්!
ඔයා ඇයත් එක්ක තරහෙන්ද?
ඔව්!!
ඇය දන්නවද ඔයා ඇයගේ කාර් එක ගත්තා කියලා?
නෑ!!!

-ඇය දන්නවද ඔයා ඇයව බලන්න යනවා කියලා?
ඔයාට වැඩක් නෑනෙ ඒක.
ඔයාගේ අම්මා දාම-ඝාතකයෙක්ද?
ඔව්!
ඇය වැඩිපුරම මරන්නේ ළමයින්ව?
ඔව්!!
ඔයා දැන් යන්නේ ඇයට දඬුවම් කරන්න?
ඔව්!!!

-ඔයා මොකක්ද කරන්නේ? මරණවද ඇයව?
ඊට පස්සේ මං ඇයගේ ඔලුව චප්ප කරලා, ඇයව කෑලි කෑලිවලට කපනවා. ඔව් ද නැත් ද? ව්‍යාකූලයි.
ඔව්!!!!
ඊට පස්සේ ඇයගේ කාර් එකට ගිනි තියනවද?” ප්‍රශ්න විස්සේ සෙල්ලම මැතියාස් තනිවම කරයි. වික්ටර්ස් පසුපස ලුහු බඳින අතරේ ප්‍රශ්න අසමින්, ඒවාට තමන්ම පිළිතුරු සපයමින් මැතියාස් වික්ටර්ස්ගේ සිතිවිලි විග්‍රහ කරන්නට වෙයි.
එසේ කරන්නේ වික්ටර්ස් ගැන මනාව අවබෝධ කර ගන්නටය.
ඒ අතරේ වික්ටර්ස්ටත් මැතියාස්ගේ වටනාකම වැටහෙන්නට පටන් ගෙනය.

දෙදෙනා උනුන් කෙරේ බැඳෙති. ඒ බැඳීම ඇති වෙන්නේත්; ඒ සමරිසි සබඳතාවට මුල පිරෙන්නෙත්.....

මෙසේ අන්‍යොනය අවබෝධය ලියලද්දී, එකිනෙකාට අනෙකාගේ සහයෝගය අවශ්‍ය වෙද්දී, දෙදෙනා උනුන් කෙරේ බැඳෙති. ඒ බැඳීම ඇති වෙන්නේත්; ඒ සමරිසි සබඳතාවට මුල පිරෙන්නෙත් අහම්බයෙනි.

මේ දෙදෙනා කලිනුත් සමකාමීන්ද?
ෆිලුම අපට කියන්නේ නැත. එහෙත් මැතියාස්ගේ පෞරුෂය ඉදිරියේ වික්ටර්ස් ඔහුට ආසක්ත වෙන බවකි පෙනෙන්නේ. නමුදු වික්ටර්ස් වුවද පෞරුෂවත් බවෙන් අඩු කෙනෙක් නොවේ. වික්ටර්ස් පිරිමි සිරුරක සිරගතවූ ගැහැනු ආත්මයක හිමිකරුවෙකු බවත් කියවෙන්නේ නැත.
හොඳේ ඒකය.
අපටත් සිතන්නට ඉඩ දෙනවා විනා, ඔක්කොම දේවල් කියන්නේ නැත.
එහෙම වුණත් මේ සමරිසි සබඳතාවේ ‘passive partner කොටස - ස්ත්‍රී භූමිකාව' කෙරෙන්නේ වික්ටර්ස් වෙතින් බවට ඉඟියක් (පැය 1 විනාඩි 2 තත්පර 38 සිට පැය 1 විනාඩි 3 තත්පර 2 අතර) තත්පර 24කදී පෙන්වයි.

මේ කායික අවශ්‍යතාවන් සපුරා ගැනීමේ සබඳතාවක්ද... ආදරයක්ද... ප්‍රේමණීය සබඳතාවක්ද? පිළිතුර සොයාගත යුත්තේ; අවසන් තීන්දුව දිය යුත්තේ The Man with the Answers චිත්‍රපටය සම්පූර්ණයෙන්ම නරඹන ඔබ විසින්මය.

ෆිලුම බලද්දී මට සිතුණු දේ; හැඟුණු දේ; දැනුණු දේ අදම හිතාදර පාඨක ඔබට ලියන්නේ නැත. මට feel වුණු ඒවා එකක් දෙකකුත් නොවේ; මහ ගොඩක් තිබේ. වඩාත් ඔබින්නේ ඒවා යළිදු ආවර්ජනය කර, නිවිහැනේ ඒ ගැන ලිවීමය.

(ආදරයේ ඔංචිල්ලා) හී ඇය වරෙක ආදරය සහ විසඹ රසය හෙවත් සම්භෝග රතිය එකිනෙකට තුලනය කොට....

ඉතිං මේ post එකේ හමාර කීමට, පසුගිය සතියක ‘සරසවිය’ පුවත්පතට නුවන් නයනජිත් කුමාර ලියා තිබුණු ලිපියකින් උද්ධෘතයක් යෙදීම ඉතා සුදුසු යැයි මට සිතෙයි!

“...... "Swings of love" (ආදරයේ ඔංචිල්ලා) හී ඇය වරෙක ආදරය සහ විසඹ රසය හෙවත් සම්භෝග රතිය එකිනෙකට තුලනය කොට මෙලෙස පවසන්නීය.

"Solace can emerge within coition.

Love can prevail within solace.
but coition doesn't mean love.
A lotus may be born through muddy moats.
but lotus means lotus
and it doesn't mean mud.

සම්භෝගය ඇතුළෙ සැනසිල්ල උපදින්න පුළුවන්.
ඒ සැනසිල්ල ඇතුළෙ ආදරය පවතින්නත් පුළුවන්.
නමුත් සම්භෝගය කියන්නෙ ආදරය නෙමෙයි.
මඩ කළල් අතරින් නෙළුමක් පුබුදන්න පුළුවන්.
ඒත් නෙළුම කියන්නෙ නෙළුමට මිසක් මඩ කලල්වලට නෙවෙයි"෴