‘පදේට උඩ යයි’ වෙන දේවල් බැලුවාම සිතා!

අසන්න වියතුනි, නෝනා මහතුනි කියන්න තියෙනව නියම  කතා
රහට කියන්නයි මේ සූදානම, එව්වා හරි ලස්සනට            ගොතා
ඉස්සර නං අපි කියවනවා කවි, අපූරුවට තාලෙකට             ලතා
තාලේ තිබ්බත්, ‘පදේට උඩ යයි’ වෙන දේවල් බැලුවාම  සිතා!

දේශපාලනේ අන්තිම තිත්තයි- උලා කාල ජීවත් වෙන්නේ

අනේ ඔන්න ඔහෙ සිදු වෙද්දෙන් වෙන
            දෙයක්, අපට නැහැ තේරෙන්නේ
දේශපාලනේ අන්තිම තිත්තයි-
            උලා කාල ජීවත්          වෙන්නේ
ඒක කෙරෙන්නෙත්, අපේම දහිරිය
           දාලා හොඳටම     නැහුනොත්නේ
කියනව ‘සමහරු කරුණු නොදන්නා’,
           වෙන දේ විමසනු මැනවි    පණේ

හම්බ කරන්නට ලේසිම කෙරේමෙ,
                  රජෙකුට පන්දම්           ඇල්ලීමයි
හොඳට ඇල්ලුවම, බාර් ලයිසමක්
                  වගේ දෙයක් ගන්නට      ඇහැකියි
එහෙමත් නැත්තං, රජයේ කොන්ත්‍රත් එකක්
                  වුණත් ‘දානය’            කෙරෙතියි
‘කල්ල මරේ’ වෙන්නේ කොමිසං සා-
                  මාජික තනතුර        දුන්නොතිනුයි

පහුගිය අවුරුදු දෙකේ පත් කරපු
                              කොමිෂන් සභාම පහකි අනේ
හොරු අල්ලන්නය කියලයි එව්වට
                                  රාජකාරියක් පැවරෙන්නේ
අල්ලපු හොරු නැත, ගහ මුල වළල්ල
                              හොයාගත්ත එක මතකයිනේ
ලක්ෂ තුන්දහස් තුන්සිය හැත්තෑවක්
                                         සභාවලින් ගිලලානේ   

සමහරු බය වෙනවාලු හීනෙනුත්, උන් කළ පව් කඳු මතක් වෙලා

කියවෙන- වෙන සමහර දේ අම්මප,
               මහදැනමුත්තගෙ කාලෙ වගෙයි
කැකිල්ලෙ රජ්ජුරුවොත් ආයෙම ඉප-
              දිලාද කියලත් විටෙක     හිතෙයි
රට කරවන අය හිතන්නෙ රටුන්ට
             කඳුළක මොළයක් නැත  කියලයි
උන්ට වැරදිලා! හීන් සැරේ බල-
             ගතුය රාම සැරයත්           පරදයි

අපූරු ලස්සන මාලා නාටක බලන දනෝ දැන්
                                                    දනිති රසේ
රටේ පොලෝසියෙ ඇත්තොත් ලියනව
                   ‘මරු තිර නාටක’ හොර  රහසේ
අයිතිකාරයෝ නැති බව කියවෙන
                                 මල්වානේ මැඳුරක් අස්සේ
Shoot කරන්නද හැදුවේ ටෙලියක්
                         ‘වසන්ත කෙළියක්’  පිටිපස්සේ?

නීතිය නැවෙනව; හොඳටම නැවෙනව
                        ලොක්කො ඉදිරිපිට බලු   වීලා
නීති තියෙන්නේ නවන්න නෙන්නං,
                        බලය ඇති අයට එකතු   වෙලා
එයත් ලේසි නැත, දැන් කාලේ young
                        ජෙනරේෂන් එක form  වෙලා
සමහරු බය වෙනවාලු හීනෙනුත්,
                        උන් කළ පව් කඳු මතක් වෙලා

කිව්වට වස් නැත, හැදෙනව වාගෙයි...

කොට්ටෝරුවො හැම ගහටම කොටනව
             හොට පැටලෙනකං කෙහෙල්  ගසේ
මෙදා පොටේ පොට වරද්ද ගත්තද,
             කොටුවේ පැත්තෙන් අපට      ඇසේ
අධි ආරක්‍ෂිත කලාප නීතිය
            ‘රිවර්ස්’ කෙරෙයි ඒ         අව්වස්සේ
කටේ නරි වදන් පෙරෙන්න ඇරඹිල
            තියෙන විත්තියක් ලොවට        දිසේ

අනේ පණේ රත්තරනෙ වස්තුවේ-
              මහ විනාශයක් කරල       තියේ
පොත් දහ දාහක පුස්තකාලයක්
              එක්කල ගෙයකුත්    විනාශයේ
ඇට නැති දිව ලෙලවලා කියන්නේ
              ඇත්තටමද ‘බොරු මේ විදියේ’
කිව්වට වස් නැත, හැදෙනව වාගෙයි
              ‘වන්දියෙ පූජා’        හදිස්සියේ

බුදුවරු දහසක් බුදු වෙන වෙලාවෙ
                මහා පාන්දර අවදි            වෙලා
පොත් කියවන ඒ මැතිඳුගෙ දුක් කඳ
                සක්කරයටවත් නැත      පෙනිලා
පෙරළුවාට පොත් දැනුම ලැබෙනවද
                කියන්න සුදනෙනි හොයා   බලා
‘O2 කන්නද’ අහයිද, තියෙ නං
                උකුණු පුකක මොළයක් ලැබිලා

මන්ද පෝෂණෙනි දරු කැල අසරණය

පුංචි සිඤ්ඤොලට මක්කා වෙන්නද,
            දැනටම හෙණ ගහලා        වාගෙයි

දෙසිය විසි පහට එහෙමද දෙයියෝ,
          උන් නැත්තං රට     අගාදෙමයි
උන්මය කියන්නෙ- අපිය අහන්නේ,
            තොත්ත බබාලා අපිම           තමයි
වතුර පැහෙනතුරු වතුර හැළියෙ හිඳ
           ‘කටක රොත්ත’ දිය කෙළිනු වගෙයි

ගොඩ මඩ දෙකම අවසානය       කම්මුතුය
හැම පැත්තේම වපුරාලා             අහේනිය
හෙට පරපුරට අද නැත නිසි       පෝෂණය
මන්ද පෝෂණෙනි දරු කැල   අසරණය

අනේ සාදු ඒකට නං කමක්                  නැත
එතකොට උන්ට අරගලයට වාරු           නැත
රජ පැටවුන්ට ඒ වාගේ විපත්               නැත
කලබල වෙනකොටම උන් හැම රටෙත්  නැත

දඬුවම් කළ යුතුය            අරගලකරුවන්ට
ලොකු රජ පුතා පවසා ඇත ගෙන  හිතට
අරලිය මැඳුරෙ සිට පොලු ගෙන   ගියවුන්ට
මොනවා කරන්නද කියලත්         පවසන්ට

ගෙවුණු මාසයේ සීයට පහකින් උද්ධමනය ඉහළටම ගිහිං

අනුන් ඇස රොඩ්ඩ දකිනා        මහත්තුරූ
තමන් ඇස පරාලය නොදකිනා         තුරූ
අපට සෙතක් කරතියි හිතුවොතින්  බොරූ
අනෙ අම්මපල් සේරම කම්බ         හොරූ   

ගෙවුණු මාසයේ සීයට පහකින්
               උද්ධමනය ඉහළටම     ගිහිං
ළඟදි බහින්නෑ දිගටම තියේවි,
                එන අවුරුද්දේ මුල        වෙනකං
පුරෝකතනෙකින් එව්ව කියන්නේ
                යමක්-කමක් දන්නා       ඇත්තන්
ලෙඩා මළත් මොක? මැරෙන්න
                වෙන්නේ බඩ              සුද්දෙන්!

ලෝකෙට පෙනුණත් ලෝකෙම කිව්වත් හොරාට එය ගණනක් නැතිය

කරාපු තරමක් කළේ අපේ ලොකු
            උදවිය ලොකු ලොකු  දේවල්ය
ලොකුම පාරවල්, ලොකු වරායවල්,
            නෙළුම් කුලුන        ආඩම්බරය
වරාය නගරය ඊටත් හපන්ය
            එන ආරංචිය මල්           පහය
ආයෝජකයන් තවම ඇවිත් නැත;
            ඉඩම් කට්ටි   වේළෙනවාය            

ලොකු ණය ගත්තම එව්වා අස්සේ
              ලොකු ගැහිලිත්            ගහගත්තැකිය
පරම්පරා හත-අටකට ඇතිවෙන
              තරමට ජරාව කෑ                    හැකිය
ලෝකෙට පෙනුණත් ලෝකෙම කිව්වත්
              හොරාට එය ගණනක්             නැතිය
ඇත්තමයි බොලේ, ලජ්ජා නැතිකම
              මහා මුදලිකමටත්                ලොකුය!

ඔක්කෝමත් හරි අපෙ මහ ඇත්තන් ගන්නා තීන්දු ලස්සනය

අප්ප කරපු කෙළි කරන්න පුතාල
                  දැන්මම හිතටත් අර    ගෙනය
නීතිය උන්ගෙයි, දවසක්වත් නැත
                  උන්ට ඇපත් දී         අහවරය
මෙහෙව් පුතාලට බලයට එන්නට
                  පාර කපන්නෙත් අපි  තොපිය
එක බූවල්ලක් මදිය; හතක් ගෙන
                  තෙමලා අපටම        තලාපිය   

   
ඔක්කෝමත් හරි අපෙ මහ ඇත්තන්
               ගන්නා තීන්දු            ලස්සනය
හැට පැන්නම රජයේ සේවකයන්
                 ‘අනිවා’ පෙන්ෂන් ගත යුතුය
අපේ රටේ දැන් තියෙන්නෙ ‘හැමටම
              එකම නීතියකි’           මනරම්ය
ඒකට ගරු කොට ‘නාකි පාලකයො’
              ඔක්කොම පෙන්ෂන් යා   යුතුය!

රකින්න වියවස්තාවේ වගන්ති පණ පුදන්න වුව ලැහැස්තිය

‘හක්කේ බුදු රැස් - බොක්කේ දඩ මස්’
                              කතන්දරේ මතකෙට       ඒය
රකින්න වියවස්තාවේ වගන්ති
                              පණ පුදන්න වුව   ලැහැස්තිය
වියවස්තාවෙන් රටම වැටෙනකොට
                              දෙගොල්ලෝම මර නින්දේය
උනුත් රකිති මුන් - මුනුත් රකිති උන්,
                              කිසිම භේදයක්    නැත්තේය

අපේ පණ ගියත් උන්ට කමක් නැත-
                        බොරුවට රඟමින් රණ්ඩු වෙතී
උන්ගෙ නඩත්තුව වෙනුවෙන් ගෙවමින්
                        ‘ජහමනයා හොම්බෙන්ම  යතී’
තව මදි කියමින් ලොකුම හැඳිවලින්
                        උන්ගේ පතටම බෙදන     ගතී
දෙයියොම බලපං! හෙණ හත එවපං!!
                         එතකොට ඒවා යයි     නැවතී෴0෴