යකිනිට ඇන්දා- සිව්වෙනි කොටස

“හැබැයි රජෝ- කාට කාට කියල හරි උඩ දම්මවගෙන; කාගෙ උදව්වෙන් හරි රජ වෙන්න නං පුළුවන් කියමුකො... ඊට පස්සෙයි අමාරුම හරිය තියෙන්නේ. නියම රජෙක් විදිහට ඇක්ට් කරන්න වෙනව!!” මට කියැවිණි;

“... එහෙම නොකළොත් නං රජෝ, බබිත් සුං බබියගෙ අම්මත් සුං!”

බුදු හාමුදුරුවන් වහන්සේ දේශනා කරපු...

“එහෙම නොකළොත් නං? ඔයා මාව රජ කරවලා බලන්නකො නිමල් අයියේ... දොඹෙන් දෙන්නං, දොඹෙන් දෙන්නං, දොඹෙන්... දොඹෙන්... රියල් රජෙක් වගේ... මෙන්න මෙහෙම.” අසෝක රජ කෙනෙකු විදිහට ආඩම්බර තාලෙන් හිටගත්තා.

වමත ඉනට තියලා දකුණු අතින් කඩුව කොපුවෙන් ඇදල ගන්න හැටියක් පෙන්නමින් සෝමවීරගෙ පැත්තට හැරුණා. “එම්බල දුෂ්ටය... එනු කඩුව- ගනු සටනට!” කියමින් අභියෝගයකුත් කළා.

සෝමවීර ‘හක හක’ ගාන්න ගත්තා. (එයාට ඔය වගේ වැරදි පටස් ගාල මීටර් වෙනවා.)
ඒ අස්සේ එතැන උන්නු ටියුබ් ලයිට් නොවිච්ච කීප දෙනාත් සෝමේ එක්ක තරගෙට වගෙයි හිනා වෙන්න ගත්තේ.

“එම්බා වසලය... මොකද යකෝ හිනා වෙන්නේ... තා මගෙත් එක්ක fight කරන්න බයයි නේද?” එතකොට අසෝක ඇහුවෙ වැඩියෙන්ම හිනා වෙවී හිටපු සෝමවීරගෙන්.
“බ.ය..යි...? බයයි නෙවෙයි යකෝ... කැතයි. උඹ මහ ලොකු මිනිහෙක්යැ බං උඹට බය වෙන්න. උඹට ඉස්සෙල්ලයි මම නිමල් දිසානායකලගේ නාට්‍යවල රඟපෑවේ. හරිද? මොට්ටයා... රජ පාර්ට් එකක් කරන්නලු යන්නේ. ඒකට මොකද රජ කෙනෙක් කතා කරන වචන මොනවද කියලවත් දන්නෑ.” සෝමවීරත් යක්ෂ මූඩ් එකෙන් කියාගෙන ගියා.

“රජ කෙනෙක් කතා කරන විදිහ නාට්‍යය ලියද්දී මේ නිමල් අයියා මට ලියල දෙයි යකෝ...” අසෝකට ඊට වැඩිය මොකුත් කියන්න බැරි වුණේ කළු අක්කා නැඟිට්ට හින්දයි.

“හපොයි නිමල් මල්ලී... මේ වැඩේ අදම- මෙතැනින්ම අල්ලලා දාමු. නයි පොළොංගු වගේ කොයි වෙලාවෙත් එක එකා මරා ගන්න බලං ඉන්න මෙහෙම එවුන් එක්ක නාට්ටි කරතහැකියැ. චී චී චී! මේ ගොල්ලෝ මෙහෙමයි කියල දන්නවා නං මම කීයටවත්...”
කළු අක්කා කියාගෙන ආව දේ කියලා ඉවර කරන්න නොදී අසෝක ඉස්සරහට පැන්නෙ එතකොට...

“පිස්සුද කළු අක්කේ... අපි එච්චරටම චාරයක් නැති එවුන් කියලද ඔයා හිතන්නේ? නේද මචං... මේ සෝමයයි මායි දැන් ටිහකට ඉස්සෙල්ලත් එක බුලත් විට දෙකට බෙදාගෙන කාල ඉන්නේ... නැද්ද මචං?
යකෝ... උගුඩුවා වගේ ඔළුව වන වන ඉඳල මදි බං. කට ඇරලා ඔව් කියපංකො. නැත්තං මෙයාල හිතයි මං බොරු කියනවයි කියලා...”

“ඔව්, ඔව්... ඕගොල්ලොන්ට විහිළුවක්වත් තේරෙන්නෑනේ... මේ නාට්‍යය ඉවර වෙනකං අපි ආයෙමත් රණ්ඩු නොවී ඉඳිමු මචං විහිළුවටවත්...
නිමල්... උඹ කියන්න පටන් ගනිං මචං බුදු හාමුදුරුවන් වහන්සේ දේශනා කරපු පද මානවක ජාතකේ ඉතිරි ටික.”

කවුද ‘එතෙන්ට එයි මල්ලි ෆුල් ඇඩල්ට්ස් ඔන්ලි සීන් එකක්!’ කියලත් කොඳුරනවා. ඒක නෑහුණු විදිහට...

“ඔව් නිමල් අයියේ...” එතකොට අසෝකත් තඩි මුක්කුවක් ගැහුවා. ”මතකයි නේද... ඔයාට කියන්න තියෙන්නේ අශ්ව මුහුණක් තියෙන යක්ෂණී වෙසමුණි රජාගෙන් මිණී කන්න වරම් ලබා ගත්ත තැන ඉඳලා.”

“කියන්නං. හැබැයි ඉස්සෙල්ල වගේ මොනම හරි බාධාවක් කළොත් මං ආයෙමත් කතාව නං කියන්නෙ නෑ!” කියා කොන්දේසියකුත් දමමිනි, මං කතාව පටන් ගත්තේ.

“මේ යකින්නි ඔහොම එයාගේ සීමාවට ඇතුල් වෙන මිනිසුන්ව අල්ලගෙන මරා කකා ඉඳිද්දි බොහොම කඩවසම් බමුණු හාදයෙක් ඒ ඉසව්වට ඇතුළු වුණා. යක්ෂණීට බමුණු තරුණයා ගැන ආදරයක් උපන්නා. එයාව අල්ලාගෙන ගුහාවට අරං ගියා...”

ඒ අස්සෙම මට ඇහුණ කවුද ‘එතෙන්ට එයි මල්ලි ෆුල් ඇඩල්ට්ස් ඔන්ලි සීන් එකක්!’ කියලත් කොඳුරනවා. ඒක නෑහුණු විදිහට මං දිගටම කතාව කියාගෙන ගියා.

“ටික කාලෙකින්ම අර බමුණු තරුණයාට දාව යකින්නිට පුතෙක් උපන්නා. ඒකි පුතාට පණ ඇරල ආදරෙයි. ඒත් පුතා ලොකු වෙද්දී දැන ගන්නවා අම්මා යක්ෂණියක් විත්තිය. එයාල දෙන්නා කැලෙන් පැනල එනවා. නගරෙට ගියාම පුතාට ජීවත් වෙන්න විදිහක් නැති බව දන්න යකින්නි පැනල යන පුතාට අන්තිම මොහොතෙදි මන්තරයක් කියල දෙනවා. බොහෝම බලගතු මන්තරයක්... ඒ මන්තරේ මැතිරුවාම හොරු ගිය අඩි පාර මතුවෙලා පේන්න ගන්නවා. ඒකෙ උදව්වෙන් හොරුන්වයි- හොරකං කරපු බඩු තියෙන තැනුයි හොයා ගත්තැකි... දොළොස් අවුරුද්දක් පරණ හොරකමක වුණත්...”

“රංජිට තිබ්බේ කීයක් දීලා හරි, ඒ මන්තරේ දන්න කෙනෙකුව හොයා ගන්න.”
“ඒ මොකටද පොඩි මාමේ?” පොඩි මාමා වගෙම මං වහන්සේත් කතන්දරේ කියාගෙන යන වැඩේට බාධා කළේ එහෙමයි.
“අපේ බතික් වැඩපොළේ ගෑනු ළමයින්ගේ සල්ලි හොරකං කරපු එකීව අල්ල ගන්න ගිය වෙලාවේ... උතුරණ තෙල් තාච්චියට අත දම්මවනවා වෙනුවට...”

“පොඩි මල්ලිත් හදන්නේ කතාව පීලි පන්නවන්නමයි, පරණ කතන්දර ඇද ඇද... එව්වට උත්තර නොදී ඔයා ඔය කතාව කියන්න නිමල් මල්ලී...” කළු අක්කා අපේ පොඩි මාමටත් සැර වුණා.

“මන්තරේ කියල දුන්නට පස්සෙත් යකින්නි බමුණටයි පුතාටයි දෙන්නටම කිව්වා එයාව දාල යන්න එපැයි කියලා. ඒත් පුතණ්ඩියා නෙවෙයි නවතින්න හිතුවේ... ඒ දෙන්නා නොනැවතී යන හැටි බලාගෙන ඉන්න බැරි දුකෙන් යක්ෂණී පපුව පැලිලා මැරෙනවා... ඒත් තාත්තයි පුතයි බරණැස් නුවරට යන ගමන නවත්තන්නෙ නෑ.

ඇමරිකානු ඩොලර් මිලියන 2.5ක මුදලක් අතුරුදන් වීමේ සිද්ධියට සම්බන්ධ බවට සැක කෙරෙන පරිගණක හැකර්වරුන් පිරිසක්...

-එයාලා එහාට ගිහිං රජ්ජුරුවො ගාව හොරු අල්ලන්න රස්සාවක් හොයා ගන්නවා. හැබැයි පුරෝහිතයා මේ පුතා එක්ක තරහයි. මිනිහා රජ්ජුරුවන්ට කේලම් කියනවා. කියල කියල රජතුමාව කැමති කරව ගන්නවා බොරුවට ලොකු හොරකමක් කරලා බමුණු පුතාගේ හපන්කම test කරල බලන්න.

-ඒ දෙන්නා මහ රෑක කාටවත් නොපෙනී හොරෙන්ම ගිහිං රාජ භාණ්ඩාගාරයෙන් ලොකු වස්තුවක් අරගෙන ඒවා රාජකීය මඟුල් පොකුණේ හංගනවා. පහුවදා උදේ එක ජංජාලයයි... හොරකම ගැන ආරංචිය රට පුරාම පැතිරුණට පස්සේ...”

එදා, ඔය විදිහට පද මානවක ජාතක කතන්දරේ කියාගෙන යද්දීවත්; 2026 අප්‍රේල් මාසය පටන් ගනිද්දී ‘යකිනිට ඇන්දා’ posts මාලාව ලියන්නට පටන් ගනිද්දීවත් නොතිබුණු තත්ත්වයක් තමයි දැන් ශ්‍රී ලංකාවේ තියෙන්නේ. හිතා ගන්නවත් බැරි තරමේ ‘තඩි හොර මගඩි’ ගොඩාරියක් සිද්ද වෙලා. තවම එළියට ඇවිත් නැති එව්වත් තියෙනවද මංදා...

ශ්‍රී ලංකා රජයෙන් ඕස්ට්‍රේලියාවට පියවීමට තිබූ අමෙරිකානු ඩොලර් ලක්ෂ 229ක ණය මුදලකින්, මහා භාණ්ඩාගාරය මගින් ගෙවන ලද ඩොලර් ලක්ෂ 25ක කොටසක් පරිගණක හැකර්වරුන් පිරිසක් අරගෙනලු!

ඇමරිකානු ඩොලර් මිලියන 2.5ක මුදලක් අතුරුදන් වීමේ සිද්ධියට සම්බන්ධ බවට සැක කෙරෙන පරිගණක හැකර්වරුන් පිරිසක් විසින්ම මුදල් අමාත්‍යාංශයේ පරිගණක පද්ධතියෙන් ප්‍රංශ ණය ආපසු ගෙවීමට අදාළ ලියකියවිලිද සොරාගෙන ඇති බවටත් තොරතුරු හෙළි වෙලාලු!! 

ඒ අතරේ තවත් හොරකමක විස්තරත් එළියට ඇවිත්ලු.
ශ්‍රී ලංකා තැපැල් දෙපාර්තමේන්තුව විසින් ඇමෙරිකා එක්සත් ජනපදයේ තැපැල් සේවාව (US Post) වෙත ප්‍රේෂණය කරන ලද රුපියල් කෝටි 20කට ආසන්න මුදලක් අතුරුදන් වෙලාලු!!!

පද මානවක තරුණ පුතණ්ඩියා වගේ සිය දෙනෙකු ආයෙමත් ඉපදිලා ආවත් මේ වගේ හොරුන්ව අල්ල ගන්න ඇහැක් වේවිද මංදා...

“ඉතිං, රාජ භාණ්ඩාගාරය හොරු බිඳලය කියන ආරංචිය පැතිරුණාම බරණැස් නුවර මිනිස්සු වැල නොකැඩී මාළිගාවට ඇදෙන්න ගත්තා. මොකද- මන්තරයක් මතුරලා හොරුන්ව අල්ල ගන්න යන විත්තියත් නුවර පුරාම පැතිරිලයි තිබ්බේ.”

“ඊට පස්සේ...” ඒ වෙද්දී සභාවේ උන්නු කව්දෝ හූමිටි තිබ්බේ නොඉවසිල්ලෙන්.

“ඊට පස්සේ පද මානවක එයාගේ අම්මටත් පිං දීලා අර මන්තරේ මැතිරුවා... මන්තරේ සත්ත එයාගේ ඇස් පනාපිටම පේන්න ගත්තා. හොරු දෙන්නා ආව- ගිය අඩි පාරවල් නියමෙටම එයාට පෙනෙන්න ගත්තා. එයා ඒ පා සලකුණු දිගේ ගිහිං- මඟුල් පොකුණේ හංගල තිබුණු වස්තුව රජ්ජුරුවන්ට හොයල දුන්නා...”

කවදටද මේ නාට්‍යය පෙන්නන්නේ? වෙසක් එකටද?

“කතන්දරේ ඉවරයිද රංජි?” සරත් රංචාගොඩ ඇහුවේ ‘සැටිස් නෑ’ වගේ මූඩ් එකකින්. “... ඔය කතාවෙන් කරන නාට්‍යයක් නැඟල යයිද?”

“කතාවේ නං තව ටිකක් තියෙනවා සරත්. කතාව ගැන ඔයාගේ අදහස අපි පස්සේ කතා කරමු නේද?”
“නිමල්, කතන්දරේ ඉතිරි ටිකත් කියලම හිටියා නං...” / “ඔව් ඔව්, දැනුත් රෑ වෙලා. අපි ගියාට පස්සේ ඔයාලා දෙන්නට ඇති පදං කතා කරගන්න බැරියැ.” ඒ සෝමවීරයි, අසෝකයි.

“ඉතිං... රජ්ජුරුවොයි පුරෝහිතයයි දෙන්නම පද මානවකට කිව්වා -නැති වෙච්ච බඩු හොයා දීලා විතරක් මදිය; හොරකම කරපු අයවත් කියන්න ඕනිය කියලා-. එතකොටත් අපේ කොල්ල දැනගෙනයි උන්නේ හොරු කවුද කියල. රජතුමායි පුරෝහිතයි තමා හොරකම කළේ කියන එක ප්‍රසිද්දියේම කිව්වොත් මහජනතාව කුලප්පු වෙන බව නුවණක්කාර පද මානවකට තේරුණා.
ඒ නිසාම එයා දන්නා තරම් උපහැරණ කිය-කියා නිස්සද්දව ඉන්නයි හැදුවේ... මොන? මෝඩ රජතුමාට ඒ තරං දෙයක් තේරුම් ගන්න බැරි වුණා... පුරෝහිතයා ඊට හපන්. රජා පද මානවකගෙන් ඇහුවා ‘තොප මේ තරං නොකියා හංගන්නේ හොරකමට තොපත් හවුල් නිසා නේද?’ කියලත්. අන්න එතකොටයි පද මානවක කිව්වේ ‘හොරකම කළේ රජ්ජුරුවොයි පුරෝහිතයයි දෙන්නය’ කියලා.

-ඒක ඇහුණු මිනිස්සුන්ට යකා නැග්ගා. හොරකම් කළා මදිවට බොරුත් කියනවයි කියලා... ගල්මුල්වලින් ගහලා හිටිය රජාව එළවලා පද මානවකට රජකම පවරනවා.”

මං වහන්සේ එහෙම කතන්දරය කියලා ඉවර කරනවාත් එක්කම අසෝක නැඟිට්ටා. ‘එතකොට නිමල් අයියේ, කවදටද මේ නාට්‍යය පෙන්නන්නේ? වෙසක් එකටද?”
“පුදුම තදියමක්නෙ හලෝ ඔයාට තියෙන්නේ?”
“යකඩේ තලන්න ඕනි රත් වෙලා තියෙද්දීමයි පොඩි මාමේ... නිවුණට පස්සෙ නෙවෙයි.”

“ඒ වුණාට අසෝක වෙසක්වලට තව සුමාන තුනක්වත් නෑ. අවුරුදු ගාණකට පස්සේ වුණත් අපි කරන වැඩේ හරියටම කරන්න ඕනිනෙ. හොඳට ප්‍රැක්ටිස් කරලා... හොඳට plan කරලා ලස්සනට කරන්න එපැයි... කලින් මහරගම නාට්‍ය කරලා අපිට හම්බ වෙලා තියෙන නමටයි- නම්බුවටයි දෙකටම හානියක් නොවෙන විදිහට...”
“එහෙනං නිමල් අයියේ, මේ පොසොන් එකටවත්...”

“මට හිතෙන විදිහට නං ඒකත් අමාරු තරං- අසෝක.”
“ඔයාට  තේරෙන්නෙ නැද්ද රංජි- දැන් අසෝක ඉන්නෙත් අමාරුවේ හොඳම එකක...”
“අනේද කියන්නෙ සරත්. ඔයාට විතරයි තේරුණේ... කොහෙද, නිමල් දිසානායකට ඔ..හො..ම අමාරුකම් තේරෙන එකක්යැ?” එහෙම කියපු අසෝක හීන් හඬින් මෙහෙමත් කිව්වේ අභිනයත් පාලා; හැමෝම හිනස්සමින්. “... මගේ අමාරුව හරියට පුක මහලා බඩ යන්න බේතක් පොවලා වගේ!”

මට නොතේරුණා නෙවෙයි. ඉස්කෝලේ නාට්‍යයකවත් පෙනී ඉඳලා නැති අසෝකට වේදිකාවකට නැඟලා රඟපාන්න තිබ්බේ පුදුමාකාර තදියමක්- නොඉවසිල්ලක්!

සිරිසුමන ගොඩගේ මැතිඳුන්ට නිවන් සැප ලැබේවා!

අන්න ඒකටත් එක්ක ගොඩගේ මහත්තයා. පුදුමාකාර උපේක්ෂා සහගත මනුස්සයෙක්; මට හමු වෙලා තියෙන මිනිසුන් අතරේ ගොඩගේ මහත්තය තරම් ඉවසිල්ලක් තිබුණු; තැන්පත් කතාබහ ලීලාවක් තිබුණු; ලාභ පාඩුවලට වඩා කීර්ති නාමයට සිද්ද වෙන්න ඇහැකි බලපෑම ගැන තැකීමක් තිබුණු වෙනත් කෙනෙක් නැති තරම්!

සිරිසුමන ගොඩගේ මැතිඳුන්ට නිවන් සැප ලැබේවා!

පියසිරි ප්‍රින්ටින් සිස්ටම්ස්හි මුද්‍රණ කළමනාකාර ජීවිතයෙන් මගේ සැබෑ ජීවිතයට ලැබුණු ලොකුම ආලෝකය ලැබුණේ ගොඩගේ ප්‍රකාශන මුද්‍රණය කෙරෙන අවදියේදීයි. (විජේසූරිය ග්‍රන්ථ කේන්ද්‍රයේ පොත්, විදර්ශන ප්‍රකාශන, සරසවි ප්‍රකාශන කිහිපයක්, සාර ප්‍රකාශන බොහොමයක්, කේ. ජයතිලක මහතාගේ පොත් රැසක්, දයා රෝහණ අතුකෝරල මහතාගේ කෘති, චන්දන මෙන්ඩිස් මහතාගේ මුල් කාලීන පොත් විතරක් නෙවෙයි- X කණ්ඩායමේ ප්‍රකාශන රැසකුත්, චිත්‍රකතා පත්තර- ළමා හා යොවුන් පත්තර ගණනාවකුත් අපි අච්චු ගැහුවේ ඒ කාලයේ. එහෙම කෙරෙද්දී ලංකාවේ ප්‍රවීන; නම් දැරූ; කෘතහස්ත ලේඛක- ලේඛිකාවන් වගේම අංකුර ආධුනිකයන් රැසකුත් හඳුනාගන්න මේ නිමල් දිසානායකට පුළුවන් වුණේ පෙර කළ පිං පලදීමෙන්! ඒ ගැන posts කීපයක්මත් මගෙන් ලියැවුණා.

ඒවායෙන් ටිකක් linksතුත් එක්කම පහතින් යොදන්නේ මුල් කාලීන ලිපි නොකියවූ උදවියට ප්‍රයෝජනවත් වුණොත් කියලයි.)   

1. මංජුලගේ 'මරියා'ට මම පැටලුනෙමි
http://nidigepanchathanthare.blogspot.com/2018/05/blog-post_12.html
2. කූචු කුචයියෝ
https://nidigepanchathanthare.blogspot.com/2018/06/blog-post_86.html
3. ආවොත් නොයා බැරිය!
http://nidigepanchathanthare.blogspot.com/2018/06/blog-post_22.html
4. Desert Rose, අරවින්ද හා රයිකී 
https://nidigepanchathanthare.blogspot.com/2019/08/desert-rose-reiki.html
5. කපුටු ගෙත්තම නං....
https://nidigepanchathanthare.blogspot.com/2020/08/blog-post_22.html
6. හිනා වෙන්න හිනා
https://nidigepanchathanthare.blogspot.com/2021/06/blog-post_8.html
7. මැංචෝසන් චාරිකා
https://nidigepanchathanthare.blogspot.com/2022/02/blog-post_19.html
8. යුවති කිරිල්ලීගෙන් බිරිඳට...
https://nidigepanchathanthare.blogspot.com/2022/10/blog-post_11.html
9. ලොකු අම්මත් එක්ක...
https://nidigepanchathanthare.blogspot.com/2023/01/blog-post_12.html
10. යළි ඉපදුණු ජෝතිට හර්බට් රන්ජිත් පීරිස් හා එක්ව සහාය වී...
https://nidigepanchathanthare.blogspot.com/2024/05/blog-post.html
11. විදර්ශනෙන්, තෑගි අරං, එනව බොලං
https://nidigepanchathanthare.blogspot.com/2024/05/blog-post_19.html
12. ‘ලෙස්ටර්’ Coffee Table පොතට ගෑවුණෙමි!
https://nidigepanchathanthare.blogspot.com/2024/06/coffee-table.html

නොඉවසිල්ලෙන්ම අසෝක පියසිරි හිතවතා පින්සෙන්ඩු වෙන්න ගත්තා.
“අනේ නිමල් අය්යේ. ඇත්තමයි රත්තරනේ. මේ දවස්වල මට හරි නින්දකුත් නෑ... යන්තං නින්ද යනකොටම පේන්න ගන්නවා මම නාට්‍යයේ act කරන හැටි. අම්මෝ... ලබන අවුරුද්ද වෙනකල් මාස දොලහක්- දහතුනක් නං බලාගෙන ඉන්න බෑ. මේ අවුරුද්දේ පොසොන් එකටත් නාට්‍යය පෙන්නන්න බැරි නං කොහොම හරි ඇසළ පෝයට... අනේ please මහත්තයෝ...’

ලංකාවේ ලොකුම පෙරහරවල් දෙකම කෙරෙන්නේ ඇසළ පෝයටනේ...

සෝමවීර මල්ලිකාරච්චිත් ඒ කතාවට ලොකු තල්ලුවක් දුන්නා. “මාත් කියන්නේ ඒකමයි මචං. මේ පොසොන් එකත් ළඟ වැඩි නං අපි ඇසළ පෝයට නාට්‍යය පෙන්නමු!”

“ඇසළ එකට? මෙහෙ ඇසළ පෝය එච්චර ලොකුවට...”
“මෙහෙ ඇසළ එච්චර ගණන් නොගත්තට නුවරයි, කතරගමයි ගණන් ගන්නේ... ලංකාවේ ලොකුම පෙරහරවල් දෙකම කෙරෙන්නේ ඇසළ පෝයටනේ...”

“ඔව් නිමල් මල්ලී... අපි එහෙම කරමු. පොඩි මල්ලී... ඔය එල්ලල තියෙන කැලැන්ඩරයකින් බලනවද ඇසළ පෝය වැටෙන්නේ කවදටද කියලා...” කළු අක්කා අපේ පොඩි මාමාට කිව්වේ එයාගේ මනාපයත් පළ කරමින්.

1979 ජුලි 16,17 දවස් දෙකේ, මහරගම නගර සභා පිටියේදී අපේ අලුත්ම නාට්‍යය පෙන්නන්න තීන්දු කරගෙනයි එදා කට්ටිය විසිර ගියේ.
ඒ වැඩ කටයුතුවලදී සේරම තීන්දු- තීරණ ගැනීමත්, නායකත්වය දැරීමත් කෙරුණේ මේ ලියන්නා අතින්මයි. එතකොටත් මේ ලියන දිසානායකයා ‘සාධාරණ ඒකාධිපතියෙක්’ විදිහටයි දැන-හඳුනන්නන් අතරේ පිළිගැනිල තිබ්බේ.

අදට ඇති නේද? ඉතිරි හරිය ලියන්නං ඊළඟ කොටසෙන්...