කියන්න කවි කර ආවේ මහතුනි....

අපේ දීපයේ - හරි ලස්සන වැඩ සිදු වෙනවා!

කියන්න කවි කර ආවේ මහතුනි - කියන්න දේවල් වැඩි       වෙනවා
අහන්න මහතුනි, අපේ දීපයේ - හරි ලස්සන වැඩ සිදු            වෙනවා
බ්රූස් ලී වගේ හැමට නෙළන්නට - විරුවෙක් බලයට  පැමිණෙනවා
ටෞකන වැඩනේ කරන්න ගත්තේ - අරටුව නැති බව හෙළි වෙනවා

ඒකත් දෙනවා, දුන්නට පස්සේ - විස්ස පරවෙලා...

‘අනුහස් තියෙනව, මම ආනන්දේ -විස්ස දෙන්න මට’  ඉල්ලනවා
ඒකත් දෙනවා, දුන්නට පස්සේ - විස්ස පරවෙලා කුණු      වෙනවා
වටේ ඉන්න උන් නූල් අදිද්දී - ලොක්කට නටන්න සිදු     වෙනවා
හිතේ හැටියටම, පුරුදු විදිහටම - රට කන කෑමත් උන්      කනවා

බැදෙන්න සිදු වී කබලේ එතැනින් - ළිපට වැටෙන්නත්...

මල්ලිත් බලයේ, අයියත් බලයම - ගන්න කියපු ඒවා             මේවා
කතා සුරංගන පරද්දවන මේ - බොරුවට මිනිසුන්         රැවටෙනවා
ඡන්දෙන් පස්සේ බඳින්න කිව්වත් -පොඩි වෙනසක් නං   කරවනවා
බැදෙන්න සිදු වී කබලේ එතැනින් - ළිපට වැටෙන්නත් සිදු වෙනවා

රටම කළුවරේ, ගමන අනතුරේ - දැනුමැත්තෝ කිව්වත් මොනවා...

කුස්සිවලදි හිටි ගමන්ම අප්පේ - ගෑස් සිලින්ඩර                   පුපුරණවා
තෙල් නැති වෙනවා, කරන්ට් කැපෙනවා - බඩු මිල ආකාසෙට යනවා
රටම කළුවරේ, ගමන අනතුරේ - දැනුමැත්තෝ කිව්වත්        මොනවා
පිළිගන්නේ නෑ, පරම්පරාවේ - ගතිය වෙන්න ඇති           කියවෙනවා

කඩේ ගියපු අය දැන් - කුණු කූඩෙට යනවා!

මේ අස්සෙම තව - තව හොඳ දේවල් වෙනවා / ලයි ලයි
බලයට ආ හැටි අමතක - වෙලාම යනවා
කඩේ ගියපු අය දැන් - කුණු කූඩෙට යනවා / ලයි ලයි
අපි විතරක් බලයේ ඉමු - කියා හිතනවා

කාට කෙළවුණාම මොකෝ කියල හිතනවා /
අම්මප එහෙම හිතනවා //

ඔන්න මහතුනේ පුංචි සිංඤොලා - ඉස්සරහට එන්නට යනවා

මොකක්ද අරුමේ, වැරැද්ද කොතනද - රටුන්ට ටික ටික වැටහෙනවා
තවත් ඉවසුවොත් රටේ ඉන්නටත් - නැති වෙන බව තේරුම්   යනවා
ප්‍රශ්න වැඩි වෙලා රතු ඉර පනිද්දි - ඉවසන් ඉන්නට බැරි       වෙනවා
ඔන්න මහතුනේ පුංචි සිංඤොලා - ඉස්සරහට එන්නට            යනවා
       

ජවයත් තියෙනව, ලෝකෙත් දන්නව - වටිනම ‘එකමුතු’ අපේ ළඟයි!

අතීත ළිං ගෙම්බෝ නොව වත්මන් - අපි නං හොඳ දැනුවත්      ඈයොයි
ජවයත් තියෙනව, ලෝකෙත් දන්නව - වටිනම ‘එකමුතු’ අපේ     ළඟයි
හතර වටේ වෙන දේවල් දකිනව - අනාගතය අයිතිත්                 අපටයි
කියන තරුණ පෙළ, ඕන්න මහතුනි - සටන් කරන්නට පෙළ ගැසෙතියි!

තෙතෙයි තෙයි - සටන් කරන්නට පෙළ ගැසෙතියි!!

කොටවන එවුන්ට මේ වංගියෙ නං - කෙළවෙනවා, එය ඉස්තීරයි

දේශපාලුවන් දිගටම කෙරුවේ - භේද භින්න වපුරපු                  එකමයි
ඒකත් කෙළවර වෙන පාටයි අද - අනේ අම්මපා හරි                  සතුටුයි
කොයි කාගෙත් ඇඟ ඇතුළෙ දුවන්නේ - එකම ලේ කියා සිහි වෙන්නයි
කොටවන එවුන්ට මේ වංගියෙ නං - කෙළවෙනවා, එය           ඉස්තීරයි
   

ඒකෙත් හොඳ එක, එහෙ යාචකයොත් - හිඟන අපට පිහිටට එන්නේ

කියන්න ලජ්ජයි රාවණ පුතුන්ට - රාමගෙ අය කන්නට       දෙන්නේ
ඒකෙත් හොඳ එක, එහෙ යාචකයොත් - හිඟන අපට පිහිටට එන්නේ
පාලකයන් අපෙ රෙදි ඇඳගෙන මුත් - නිරුවත් වීලයි දැන්     ඉන්නේ
තවමත් උන් වට, සට්ටඹියන් හිටු - කියලා ‘ගොනුන්ට     අන්දන්නේ’

බය නැති ලොක්කා හැංගිල වාගෙයි - සේනා රැකවරණය එක්ක

‘මම නං බය නෑ’ කිව්වලු ඉස්සර - මිතුරෙක් කළුවර      වෙලාවක
ඇහුවලු අනෙකා ‘එහෙනං ඇයි බං - හෝදන්නේ උඹ මගේ  පුක?’
කතන්දරේ මගෙ සිහියට එනවා - අනේ මං කරන්නේ         මක්ක
බය නැති ලොක්කා හැංගිල වාගෙයි - සේනා රැකවරණය    එක්ක

ජන අරගලයට උදව් කරනු ඇත....

අම්මල අත දරුවෝත් වඩාගෙන - නොදරුවො සේරම එකතු කරන්
බුරුතු පිටින් සටනට එක් වෙද්දී - බය නොහිතෙන්නේ කාටද  දැන්
හෙටානිද්දටම මැරිච්ච ඈයොත් - නැඟිටල ඇවිදින් මිනී      වළෙන්
ජන අරගලයට උදව් කරනු ඇත - කරවාලා ලොක්කන්   හොල්මන්

බලා ඉඳිල්ලා ගොට්ට අල්ලගෙන....

හැට නව ලස්සේ හුඟාක් කට්ටිය - පසු තැවෙමින් දැන් මේ    පැත්තේ
පණ පිටින්ම මිය ගිය ගජයෝ නං - තවමත් ඇත ඔහෙලගෙ   මත්තේ
අල්ලන් හිටියොත් ගොඩම තමා යැයි - කියලයි උන් හිතනව ඇත්තේ
බලා ඉඳිල්ලා ගොට්ට අල්ලගෙන - ගෝඨ ගෝත වෙයි මේ   වැත්තේ

පුරුදු ‘රිවර්ස්’ එක කරන්න නැකතක් - ඥානක්කටවත් හොයන්න බෑ!

ගඟක් ගලන්නට ගත්තට පස්සේ - ඉස්සරහට මිස පස්සට               බෑ
හරහට බැමි බැඳ හරස් කළත් යළි - මුහුදට යනු වළකන්නත්          බෑ
ජන්මෙට වැඩියෙන් පුරුද්ද ඉස්මතු - වෙනවාමයි නවතන්නත්       බෑ
පුරුදු ‘රිවර්ස්’ එක කරන්න නැකතක් - ඥානක්කටවත් හොයන්න බෑ

සාධාරණ සටනකදී ඉස්මතු වෙනවාමයි ඇති මිනිස් ගුණේ

රස්සා කෙරුවට, නිලතල දැරුවට -
        හිත පපුවක් ඇති                         මිනිස්සුනේ
සාධාරණ සටනකදී ඉස්මතු

        වෙනවාමයි ඇති මිනිස්                      ගුණේ
නොහොඳ හොඳ දෙකත් තේරෙනවා ඇති -
        පෙන්නුවෙ නැතිවට තියෙන             සෙනේ
හෘදය සාක්ෂිය වද දෙන දිනකට -
       අද හෙට දිනකර                           පායන්නේ

විනයක් සහිතව සටන් කරනකොට - දිනුමත් අත ළඟ තමයි ළමයි!

අනුන්ගෙ පිහිටෙන් ඉගිලුණ අයටත් -
        නරක කාලයක් ලබල                    වගෙයි
හතර වටෙන්; ලෝකෙන්; මේ -
        අරගල අනුමත කෙරෙනා හැටිත් පෙනෙයි
විනයක් සහිතව සටන් කරනකොට -
        දිනුමත් අත ළඟ තමයි                     ළමයි
ඔහොමම පෙරටම ගමන් කරමු ජය -
        කනුව ඔබලගේ අත                      ළඟමයි

උතුරණ ජවයයි, එකම අරමුණයි - සංයමයකිනුත් සමන්විතයි

දේශපාලනේ නායකයන් නැත; පිල් නැත - හැමෝම එකා වගෙයි
උතුරණ ජවයයි, එකම අරමුණයි - සංයමයකිනුත්       සමන්විතයි
මේ දරුවන් මේ සටනේ ඉන්නේ - සිරිලක් අම්මා රැක     ගන්නයි
අනේ දරුවො ඔය දුවල-පුතාලා - ඔක්කෝටම තිසරණ    සරණයි

අනාගතේදිත් මෙහෙම නොවෙන්නට- අපි කාටත් මෙව්වයි පාඩම්!

අතීත පරපුර දේශපාලනෙදි - ගත්තේ අනුවණ               තීරණයන්
ඒවට වන්දිය ගෙව්වේ අපගේ - පරම්පරාවයි, ඔබයි                 ඉතිං
අපේ වැරැද්දත් හරි ගස්සන්නට - පැවරුණෙ ඔබටයි සමා      වෙයං
අනාගතේදිත් මෙහෙම නොවෙන්නට - අපි කාටත් මෙව්වයි පාඩම්!

අනාගතේදිත් මෙහෙම නොවෙන්නට -
                          අපි කාටත් මෙව්වයි පාඩම්!!

‘නමියගේ වීදිය’ blog අඩවියේ රචක සහෘදයාගේ ඇරයුම පිළිගෙන- මහරගම, පමුණුවේ පදිංචි නිමල් දිසානායක විසින් ප්‍රබන්ධ කරන ලද පළමු කවි කොළය සේම මෙයත් ඔබගේ පහන් සංවේගය උදෙසාය; රචනා කෙරුණේ෴